Usa ka mag-uuma ang gipatay ug 16 ang arbitraryong giaresto sa mga elemento sa Armed Forces of the Philippines sa milabayng mga semana.

Pagpatay. Gipusil patay sa mga elemento sa 85th IB ang lider-magniniyog nga si Armando Buisan sa Barangay Santa Maria, Catanauan, Quezon niadtong Nobyembre 14. Si Buisan, 60, residente sa Sityo Luyahan, Barangay Magsaysay, General Luna ug lider sa Coco Levy Fund Ibalik sa Amin sa maong lungsod.

Halos tulo ka dekadang gipanalipdan ni Buisan ang katungod sa mga magniniyog. Sa wala pa siya gipatay, nanawagan ang grupo sa biktima nga patas-an ang presyo sa kopra ug maghatag og ayuda ang gubyerno tungod sa magkasunod nga bagyong miigo sa Bondoc Peninsula.

Istraping ug pag-aresto. Walay puas nga gipabuthan ug giaresto sa nag-operasyong mga sundalo sa 58th IB ang unom ka mag-uuma, lakip ang tulo ka menor-de-edad, sa Sityo Lanesehon, Barangay Bunal, Salay, Misamis Oriental niadtong Nobyembre 1.

Padulong ang mga biktima sa bukid aron mag-ani og humay dihang pabuthan sila sa mga sundalo. Human niini, gidetine sila sa kampo sa militar sa baryo. Pagkagabii, pugos nga gipapirma sa kumander sa 58th IB nga si Lt. Col. Canatoy ang mga biktima sa dokumentong nagsulting wala sila gipasakitan sa mga sundalo. Mibalibad ang mga biktima.

Sa maong gabiuna, nataho ang pagpangulata sa mga sundalo sa usa ka sibilyan sa Barangay Tingalan, Opol sa parehong prubinsya.

Sa Leyte, giaresto sa mga sundalo sa 93rd IB ug 802nd Brigade ang pito ka managsuon sa Sityo Utap, Barangay Canlampay, Carigara niadtong Nobyembre 13. Lima kanila ang mga menor de edad lakip ang usa ka masakiton. Gidakop sila dihang gireyd sa mga sundalo ang ilang balay. Giaresto usab ang ilang inahan nga si Nora Dionelda nga giakusahang asawa sa Pulang manggugubat. Tibuok adlaw usab nga gidetine kauban nila ang 11 pa ka kalalakin-ang residente. Nagpabiling nakadetine si Dionelda ug ang iyang magulang nga anak nga si Ernie.

Sa Negros Occidental, duha ka mag-uumang myembro sa Kilusang Magbubukid ng Pilipinas ang giaresto sa 94th IB sa Sityo Basak, Barangay Buenavista, Himamaylan City niadtong Nobyembre 19. Giakusahan silang mga myembro sa Pulang hukbo ug gipasakahan og gama-gamang kasong illegal possession of firearms. Kasampatangang nakadetine ang duha sa Himamamaylan City Police Station.

Samtang 20 ka kabatan-onang boluntir nga myembro sa Anakbayan ang iligal nga giaresto sa mga pulis sa Vente Reales, Valenzuela City niadtong Nobyembre 17. Gidakop sila samtang naghimo og kusinang bayan tungod kuno sa paglapas sa mga restriksyon sa lockdown.