Malampuson nga napugngan sa barikada sa mga kabus ang demolisyon sa Sityo Back-Matimco, Barangay Subangdaku, Mandaue City, Cebu sukad niadtong Nobyembre 11. Giatake sila sa mga pulis ug ginsakpan sa lokal nga gubyerno aron idemolis ang ilang mga balay sa ngalan sa paglapad sa mga kalsada. Gipangulohan ang barikada sa Panaghugpong-Kadamay Cebu.

Sa Quezon City, kapin 1,000 kabus sa kasyudaran ang nagprotesta sa Barangay Bagong Silangan, Quezon City niadtong Nobyembre 18 aron iduso ang ilang katungod sa disenteng puloy-anan ug panginabuhian.

Ayha niini, niadtong Nobyembre 9, nagprotesta usab ug nakipagdayalogo ang mga kabus sa pagpanguna sa Pinagkaisang Lakas ng Mamamayan sa lokal nga gubyerno sa Quezon City. Gitugutan sila nga ugmaron ang 118 ka ektaryang abandunadong yuta nga sakop sa maong barangay.

Nagprotesta usab ang mga drayber ug opereytor sa dyip kauban ang kanilang mga tigsuporta sa Quezon City niadtong Nobyembre 9. Padayon nilang giduso ang pagbalik-pasada sa tanang mga dyip.

Niadtong Nobyembre 18, miadto ang 700 ka drayber sa motorsiklo sa FoodPanda Philippines sa Department of Labor and Employment sa Intramuros, Manila aron paimbestigahan ang pagpangbarat sa kumpanya ngadto kanila. Matud nila, adunay mga higayon nga nakadawat lamang sila og ₱11.45 aron magdeliber og pagkaon sa byaheng walo ka kilometro. Ginapadagan Ang Food Panda sa multinasyunal nga kumpanyang Delivery Hero nga nakabase sa Germany.

Dugang suhulan, nakab-ot sa unyon

Nakab-ot sa mga mamumuo sa Davao Central Chemical Corporation (DCCC) ang makatarungang dugang-suhulan ug benepisyo sa ilang collective bargaining agreement (CBA) alang sa tuig 2020-2022.

Mipirma sa CBA ang DCCC Independent Union-NAFLU-KMU ug maneydsment sa kumpanya niadtong Nobyembre 17. Ang maong kumpanya naga-eksport og activated carbon ug uban pang kemikal.

Nakab-ot sa mga mamumuo ang ₱1,350 kada bulan nga dugang suhulan sa 2021 ug lain pang dugang sa 2022. Nadugang usab sa listahan sa mga benepisyo ang insentibong ₱2,500 para sa mga nagserbisyo na og lima ka tuig.