Duha ka lider-aktibista ang dungan nga gin-aresto sang mga pulis sa Bicol sang kaagahon sang Mayo 2. Gin-aresto si Dan Balucio, pangkabilugan nga sekretaryo sang Bayan-Bicol kag pastor sang National Council of Churches in the Philippines, sa iya nga balay sa Sto. Domingo, Albay. Gin-aresto man si Sasah Sta. Rosa, tagapamaba sang Jovenes Anakbayan, sa Villa Obiedo, Cararayan, Naga City.

Para paggwaon nga lehitimo ang mga operasyon, gintamnan sang mga pulis sang mga armas kag eksplosibo ang mga balay sang biktima. Gin-akusar man sila nga mga katapo sang Bagong Hukbong Bayan (BHB). Kadungan man nga ginreyd sang mga pulis ang balay ni Justine Mesias, tagapamaba sang Youth Act Now Against Tyranny Bicol, apang wala siya didto. Ang mga mandamyento nga gingamit sa mga reyd nga ini ginpagwa ni Judge Edgar Armes sang Legazpi City Regional Trial Court.

Sa Antipolo City, gin-aresto sang 80th IB kag Philippine National Police-Rizal ang 30 Dumagat sa Barangay Calawis sang Abril 13. Gintiplang ang mga tumandok kag ginpakadto sa barangay hall para kuno magbaton sang ayuda. Gin-akusar sila nga may kaangtanan sa BHB.

Antes sini, may 30 tumandok man halin sa Barangay Puray, Rodriguez, Rizal ang ginpasakaan sang kaso nga rebelyon sang ikaduha nga semana sang Marso. Gin-aresto man sa pareho nga banwa si Benito Lucido, pangulo sang Integrated Association of Agrarian Reform Beneficiaries, kag ang iya nga asawa sang Mayo 6. Gindala sila sa istasyon sang pulis kag indi pa maathag kon ano ang igapasaka nga kaso sa ila.

Gin-aresto man sa adlaw nga ina ang tumandok nga Dumagat nga si Garry Doroteo sa iya balay sa Tanay. Lakip si Doroteo sa mga nagapamatuk sa Kaliwa Dam.

Sa General Nakar, gin-aresto kag ginsakay sang militar sa helikopter ang kagawad sang Barangay Lumutan nga si Loreto Miranda Bolino. Wala pa gihapon siya ginatuhaw tubtob subong.

Sa Bohol, iligal nga gin-aresto ang mangunguma nga si Alfie Sarsale sa Barangay Rizal, Batuan sang Abril 30. Ginsalakay sang mga pulis ang iya nga balay kag amo man ang iya ginikanan. Ginkawat man ang ₱23,000 nga kita sang mag-amay halin sa pagbaligya sang ila nga kalabaw.

Pagpamatay. Ginpatay sang mga elemento sang 15th IB si Frederico Rivera, residente sang Barangay Pinggot, Ilog, Negros Occidental sang Abril 24. Ginpagwa sang mga suldado nga napatay ang biktima sa isa ka engkwentro.

Pekeng pagsurender. Pilit nga ginpasurender sang 2nd ID ang mga residente sang Barangay San Jose, Antipolo City sang Abril 23 bilang mga taga-suporta sang BHB.

Ginpasurender man sang 15th IB kag 11th IB ang mga residente sang Sityo Taya-o, Barangay Narra kag Sityo Malabago, Barangay Tambad, Cauayan, Negros Occidental sang Abril. Kabahin ini sang nakapokus nga operasyon militar sang amo nga mga yunit sa lugar.

Militarisasyon. Halos isa ka bulan na nga nagapatuman sang blokeyo ang 1st IB kag 80th IB sa mga komunidad sang mga tumandok nga Dumagat kag Remontado sa Barangay Puray, Rodriguez, Rizal kag Barangay Umiray, General Nakar, Quezon.

Sa Negros Occidental, ginkordon sang 15th IB ang Barangay Pinggot, Ilog, Negros Occidental halin pa sang Abril 24. Istrikto nga ginkontrol sang mga suldado ang pagwa-sulod kag hulag sang mga residente sa nasambit nga mga komunidad.

Kalakasan. Ginreyd sang 62nd IB ang apat ka balay sa Himamaylan, Negros Occidental sang Marso 22. Ginbakol ang pila ka residente kag gintayaan sang pusil samtang ginainterogar.