Siyam ka suldado ang napatay samtang siyam ang napilasan sa mga taktikal nga opensiba sang Bagong Hukbong Bayan (BHB) sa mga prubinsya sang Abra, Camarines Sur, Sorsogon, Bohol kag Bukidnon sa nagligad nga mga semana. Samtang, 16 ka suldado man ang ginreport nga napatay sa mga operasyon sang BHB sa isla sang Negros sang Marso.

Gin-ambus sang BHB-Bohol sang Abril 26 ang mga katapu sang CAFGU sa idalom sang kumand sang 47th IB sa Barangay Aloja, Batuan, Bohol. Duha ang ginreport nga napatay.

Sa Abra, isa ka katapu sang CAFGU ang napatay sa Barangay Poblacion, Lacub sang Abril 24. Sa Sorsogon, isa pa ka katapu sang CAFGU nga nagaserbi nga ahente sang paniktik sang 31st IB ang napatay sa Barangay Sta. Cruz, Barcelona sang Abril 23.

Sa Bukidnon, naglunsar sang operasyong haras ang BHB batuk sa mga suldado sang 8th IB nga nagabantay sa kumpanya sang konstruksyon sang UBI sa Purok 6, Barangay San Roque, Quezon sang Abril 20. Isa ka suldado ang napatay samtang tatlo ang napilasan.

Sa isa ka kontra-atake sang BHB-Camarines Sur sang Abril 5, napatay ang apat ka suldado sang 96th IB kag lima ang napilasan sa Barangay Del Carmen, Lagonoy. Pila ka oras pagkatapos sini, ginpalukpan sang eksplosibo sang mga Pulang hangaway ang trak sang militar sakay ang nagaresponder nga mga suldado.

SA NEGROS ORIENTAL, gin-ambus sang mga Pulang hangaway ang nagaoperasyon nga yunit sang 62nd IB sa Mabanga, Barangay Bagtik, La Libertad sadtong aga sang Marso 15. Kinse ka suldado ang napatay sa 30-minutos nga inaway samtang siyam ang napilasan. Sa Negros Occidental, isa ka suldado man ang napatay sang palukpan sang BHB ang detatsment sang CAFGU sa Barangay Sikatuna, Isabela sang Marso 7.