Wala sang paglaum nga maganubo sa masunod nga mga bulan ang presyo sang ginproseso nga mga pagkaon, pareho sang delata, hotdog kag iban pang nakasalig sa dumuluong nga sangkap, kag mga pagkaon nga nakasalig sa imported nga produkto pareho sang tinapay kag gatas. Ini bangud sige-sige ang pagtaas sang presyo sang mga basehang produkto nga pagkaon sa pagkalibutanon nga merkado.

Suno sa Bloomberg Agriculture Spot Index sang Abril, nagrekord ang mga presyo sang trigo, mais kag soybean sa pangkalibutanon nga merkado sa pinakamataas nga lebel sini halin 2013. Ini bangud sa maluya nga ani sang mga pungsod nga nagaimport sang amo nga mga produkto kag paglamon sang China sa nagapadaku nga bolyum sang amo nga produkto para sa konsumo sang mga industriya sini.

Ginagamit ang trigo sa paghimo sang tinapay kag iban nga pareho nga produkto, samtang ang mais kag soybean ginagamit bilang feeds (pagkaon sang hayop). Sangkap man ini sa paghimo sang toyo, tokwa kag iban pang produkto.

Apektado ang Pilipinas sa amo nga pagtaas bangud ginaimport sini ang 100% kinahanglanon nga trigo kag halos 99% sang soybean. Ang pagtaas sa presyo sang feeds (pagkaon sang manok kag baboy) mabatyagan subong sa pungsod sa porma sang mataas nga presyo sang karneng baboy kag manok sa lokal nga merkado.

Sang Abril 8, nagpaggwa na sang tantya ang Food and Agriculture Organization sang United Nations nga padayon nga magataas ang presyo sang mantika, karne kag gatas.

Sa nagligad nga napulo ka tuig, nagtaas ang import dependency ratio sang Pilipinas sa halambalanon sang pagkaon. Halin 18% sang 2010, ara sa 29% na ini sang 2019. Buot hambalon, masobra sangkap-at na sang pagkaon sang pungsod nakasalig sa suplay o kakulangan sini—sa pangkalibutanon nga merkado. Lakip sa kada tuig nga nagataas ang bolyum sang ginaimport nga bugas (23% sang lokal nga suplay sang 2019), karneng baboy, baka kag manok. Halos bug-os nga ginaimport sang mga nagamanupaktura sang pagkaon kag ilimnon ang mga sangkap nga ginagamit nila sa produksyon.