UBAN SA MINILYONG katawhan sa kalibutan nga nagpahigayon og mga protesta isip pakighusa sa mga Palestino, nagmartsa padulong embahada sa Israel sa Bonifacio Global City (BGC) sa Taguig City ang mga kabatan-onan ug uban pang sektor niadtong Mayo 15. Subli nilang gikundena ang henosidyo sa US ug Israel sa Gaza, ilabina ang pag-atake niini sa Rafah, ang giilang “ulahing sangtwaryo” sa gatusan ka libong Palestino.

Gisulayan pagbungkag sa mga pulis ug mga gwardya sa BGC ang protesta, hinungdan sa pagkasamad sa 15 ka raliyista.

Pagkahapon, naglunsad og bulag nga protesta sa Quezon City ang laing grupong progresibo ug nasudnong-demokratiko.

Kabahin ang mga aksyon sa internasyunal nga panawagan aron dumdumon ang ika-76 nga anibersaryo sa Al Nakba (Ang Dakung Katalagman) kung asa unang bangis nga gipalayas sa Zionistang kalihukan ang mga Palestino sa ilang yuta aron tukuron ang estado sa “Israel.” Sa tibuok kalibutan, gipakusog sa katawhan ang mga protesta batok sa Zionistang Israel atubangan sa walay puas nga pagpamomba ug pagpangatake niini sa Gaza. Lakip dinhi ang pagbwelo sa mga protesta sa mga estudyante sa kapin 100 ka dakung unibersidad sa US, ingonman sa France ug Australia.

Matud sa mga nagprotesta, ang kasamtangang gakahitabong henosidyo sa Gaza labaw nga mas grabe pa sa Nakba niadtong 1948 ug sa ingon kinahanglang padayon kining batukan sa katawhan sa tibuok kalibutan aron ipahunong kini.

Gikan Oktubre 7, 2023, kapin 38,000 ka Palestino na ang gipatay sa US-Israel sa Gaza, ug kapin 2 milyon na ang nawad-an og panimalay ug napalayas sa ilang mga komunidad.