NAGBARIKADA ANG MGA minero sang Dontog-Manganese Pocket Miners Association (DOMAPMA) batuk sa dako nga kumpanya sa mina nga Benguet Corporation, Inc. (BCI) sa Sityo Dalicno, Barangay Ampucao, Itogon, Benguet sadtong Mayo 13. Ang barikada ang kabahin sang ila paghimakas para pangapinan ang ila kinamatarung sa duta kag palangabuhian batuk sa sapilitan nga pagpang-agaw sang BCI sa mga pocket mine sang DOMAPMA kag indi makatarunganon nga pagpataas sang arkila sang mga kagamitan pangmina.

Sa sugo sang BCI, ginbawalan sang lokal nga mga ahensya sang gubyerno ang ginagmay nga operasyon sang mina sang DOMAPMA tungod sa hambalanon sang “regulasyon” kag “isyu pangkinaiyahan” nga tuga kuno sang operasyon. Nagapati ang mga minero nga rason lamang ini para makasulod ang BCI sa lugar.

Yara sa 500 tubtob 1,000 ka mamumugon ang mawad-an sang palangabuhian sa iligal nga pagpa-untat sang ila nga palangabuhian. Apektado man ang pagpangabuhi sang mga tumandok sa komunidad kag mga katambi nga barangay, kag mangin sa iban nga prubinsya sa Cordillera kag Cagayan Valley nga diri nagatrabaho.

Bag-o pa man ginpa-untat ang operasyon sang ginagmay nga minahan, ginsulay na sang BCI nga ilusot ang ila operasyon sa erya sang DOMAPMA upod ang pila ka bahin sang mga barangay sang Ampucao kag Virac. Ginkasabwat sang kumpanya ang National Commission on Indigenous Peoples para iratsada kag dayaon ang mga dokumento para sa espesyal nga permit. Gintuyo nila nga palibuton ang proseso sang pagkuha sang Free, Prior, ang Informed Consent halin sa mga tumandok sa lugar.

Bag-o pa sini, nagtigayon na sang barikada batuk sa mapang-abuso kag makawat nga BCI ang iban pa nga mga residente sang Barangay Ampucao sadtong Abril. Duso nila nga himuon mas barato ang bili sang mga kagamitan pangmina nga ginapa-arkilahan sa ila.