Ibalik ang 5-tuig nga prangkisa! Nagprotesta ang pila ka gatos ka drayber kag opereytor sang dyip sadtong Mayo 16 sa atubang sang LTFRB sa Quezon City para kundenaron ang kasuguan nga dakpon ang mga wala nagpaidalom sa sapilitan nga konsolidasyon sang mga prangkisa. Ginduso sang mga drayber kag opereytor nga ibalik ang ila 5-tuig nga indibidwal nga prangkisa para sa ila palangabuhian. Sadtong Mayo 14, nagprotesta man sila sa atubang sang Korte Suprema para itulod ang korte nga magpagwa na sang sabat sa ila nga petisyon para ipa-untat ang sapilitan nga konsolidasyon kag implementasyon sang PUVMP.

Lider-mamumugon sang KMU-SMR, ginpangita sa kampo-militar. Naglunsar sang search mission ang mga himata ni William Lariosa, gin-abdak nga lider-manggawa sa Southern Mindanao, sadtong Mayo 14. Nagkadto sila sa kampo sang 1003rd IBde sa Davao City pagkatapos sang isa ka tip nga didto gintago si Lariosa. Nagkadto man sila sa panrehiyon nga upisina sang CHR kag DOLE sa Davao City para ipalapit ang kaso sang gin-abdak nga lider.

Adlaw sang Mamumugon Pang-ikaayong lawas, gindumdom. Nagmartsa ang mga mamumugon pang-ikaayong lawas sadtong Mayo 7 sa Manila kag Baguio City. Panawagan nila ang makabuhi nga sweldo, seguridad sa trabaho, dugang nga mga tinawo sa ospital, mga kinamatarung sa pamugon kag kinamatarung sang pumuluyong Pilipino sa ikaayong-lawas. Ginlunsar man nila ang mga protesta kag iban pa nga aktibidad sa mga syudad sang Iloilo, Bacolod, kag Cebu, sa Camarines Norte, kag mga rehiyon sang Soccsksargen kag BARMM. Ginpangunahan ang mga ini sang Health Workers United for Wage Increase kag Alliance of Health Workers.

Mga mamumugon sang PLDT, magawelga. Nagboto ang 3,390 sa kabilugan nga 4,041 ka unyonisado nga mamumugon sang PLDT pabor sa pagwelga sa atubang sang indi pagsabat sang maneydsment sa panawagan nga buksan ang negosasyon sa CBA para sa 2024-2027. Ginlunsar nila ang strike vote ukon pagboto nga magwelga sadtong Mayo 14 tubtob 15 sa tanan nga sanga kag upisina sang PLDT sa pungsod. Tatlo ka bulan na nga ginhatag sang unyon ang paabot para sa negosasyon apang wala sang sabat kag hungod nga ginapa-atrasar sang kumpanya ang pagsugod sini. Nagprotesta man sila sa DOLE sa Intramuros, Manila sadtong Mayo 13.

73-ektarya nga duta sa Angeles City, ipakigbato. Nagpiket ang mga mangunguma kag residente halin sa Barangay Anunas, Angeles City, Pampanga sa DAR kag Kongreso sadtong Mayo 13 kag 14. Ginpanawagan nila ang pagbawi sa 73-ektarya nga duta sa Sityo Balubad nga ginhugakom sang Clark Hills Properties Corporation. Nagpasaka sang resolusyon sa Kongreso para imbestigaran ang pagpang-agaw sang duta.