Sa nagligad nga mga semana, wala untat ang terorismo sang estado sa idalom sang rehimen Marcos. Nalista ang mga kaso sang pagpamomba, iligal nga pag-aresto kag pagpang-ipit sa pagkaso sang “terrorism financing” batuk sa mga demokratiko nga organisasyon kag sektor.

Pagpamomba. Naghulog sang 10 ka bomba ang mga jet fighter sang Philippine Air Force sa mga barangay sang Peñablanca, Cagayan sadtong Mayo 10 sang alas-2 sang kaagahon. Nagtupa ini sa Sityo Ebi, Lapi kag katambi nga mga barangay. Nabatian ang makalilisang nga mga palupok, istraping kag pagpalupad sang jet fighter tubtob sa mga banwa sang Baggao, Enrile, Amulung kag sa Tuguegarao City. Indi magnubo sa 690 ka pamilya ang napilitan nga magbakwit tungod sa terorista nga pag-atake sang militar sa mga komunidad.

Pag-aresto. Gin-aresto sadtong Abril 21 sang mga suldado ang 4-bulan nga nagabusong nga Dumagat-remontado nga si Manilyn dele Cruz. Ginpasibangdan siya nga katapo sang Bagong Hukbong Bayan (BHB), kag ginpasakaan sang sampaw-sampaw nga kasong criminal. Bag-o dakpon, na-igo siya sang bala halin sa patarasak nga pagpaniro sang mga suldado sa kubo nga iya ginadayunan upod ang pamilya sa Sityo Pinamaypayan, Barangay Umiray, Dingalan, Aurora.

Sa Taguig City, ginhukman kag ginpriso sadtong Mayo 16 sa kaso nga rebelyon ang NGO worker nga si Maria Salome Crisostomo-Ujano, 67 ang pang-edaron. Gindalahig si Ujano sa isa ka engkwentro sang BHB kag mga suldado sa Quezon nga nahitabo sadtong Nobyembre 2005.

Sa Cebu City, ginpa-aresto sadtong Mayo 13 ang 26 ka subong kag daan nga mga tinawo sang Community Empowerment Resource Network (Cernet) Inc (kabahin ang tatlo ka patay na) kag isa ka lider-mamumugon sa kaso nga “terrorism financing.” Ginapasibangdan ang organisasyon sang pagpondo sa BHB-South East Negros. Nagpyansa ang mga biktima para temporaryo nga mahilway.

Pagpaulan sang bala. Nagpaulan sang bala ang 94th IB sa Barangay Carol-an, Kabankalan City, Negros Occidental sadtong Mayo 6 nga ginpagwa sini nga isa ka engkwentro. Tungod sa pagpaniro, nagbakwit ang masobra 480 ka residente sang Sityo Tagoc, Bobon, kag Matampa sang Barangay Carol-an. Kabahin sa napilitan nga magbakwit ang 146 ka bata kag 14 ka mga tigulang.

Kapintas sa mga kababainhan. Ginpahublas ang mga asawa nga babaye sang mga detenido pulitikal nga nagbisita sa National Bilibid Prison sadtong Abril 21. Isa sa ila ang 10 ka beses nga ginpatuwad sang isa ka upisyal sang prisohan. Sa rason nga pagpangita sang iligal nga druga, masami ginapatuwad kag ginalantaw ang pribado nga bahin sang mga babaye nga nagabisita sa prisohan.

Pagpang-ipit. Ginpahog kag gin-ipit sang mga ahente sang 10th ID si Ricardo Baron, 71, organisador sang Transmision-Piston sadtong Mayo 9 sa Agdao, Davao City. Duha ka oras siya nga “ginhinun-anon” sang mga ini kag “ginpasungka.”

Sa Ilocos Norte, arbitraryo nga ginkumpiskar sang lokal nga pulis ang mga questionnaire sang Alyansa ng mga Magsasaka sa Ilocos Norte (AMIN) nga nagahibalo sa kahimtangan sang komunidad subong nga panahon sang El Niño sa Barangay Puzol, Pinili sadtong Mayo 10. Base sa AMIN, nagkadto ang mga upisyal sang pulis sa balay sang isa ka residente sang barangay kung sa diin ginkumpiskar ang mga dokumento.