PILA KA SEMANA BAG-O ang ika-7 ka tuig nga anibersaryo sang pagpamomba sang Armed Forces of the Philippines (AFP) sa Marawi City, naglunsar sang hublag protesta ang mga residente diri para iduso ang tuman na nga na-atrasar nga hustisya. Sadtong Mayo 13, nagtipon sa Rizal Park sa syudad ang mga residente nga tubtob subong wala pa nakabalik sa ila mga komunidad.

Ginsaway nila ang pagpangbarat sang Marawi Compensation Board (MCB) sa nagakadapat nila nga mabaton nga kumpensasyon ukon bayad danyos para liwat matukod ang nawasak nila nga mga balay kag propedad. Sa baylo nga ihatag sa ila ang nagaka-igo nga pondo, nagpagwa sang bag-o nga “pamaagi” sang pagsuma sang kahalitan ang MCB kung sa diin ginbuhin ang “depreciation cost” (nabuhin nga bili sang ginapanag-iyahan tungod sa pagligad sang panahon ukon pagkaguba) sang mga propedad. Mas daan ang istruktura, mas dako ang buhin kag sa amo mas gamay ang kumpensasyon. Sa idalom sini, awtomatiko nga buhinan sang 60% tubtob 85% ang gintalana nga kumpensasyon sang isa ka claimant kung minimum nga 10 ka tuig ini nga nakatindog bag-o bombahan sang AFP.

Kabaliskaran ini sa una nga gintalana nga proseso sang Implementing Rules and Regulations (IRR) sang Marawi Siege Victims Compensation Act. Gintalana sa laye nga ini ang kumpensasyon base sa “fair market value” (ukon presyo sa merkado) nga resulta sang mga konsultasyon sa mga claimant, ukon sa “replacement cost” ukon “repair cost” sang mga lubos nga nawasak ukon may bahin nha naguba nga mga balay ukon bilding pangkultura kag komersyal. Wala sang awtoridad ang MCB nga bag-uhon ang mga istandard sang pagsuma nga nahan-ay na sa laye, base sa mga nagprotesta.

Ginabulubanta nga kinahanglanon magtigana ang pungsodnon nga gubyerno sang indi magnubo sa ₱5 bilyon kada tuig para mabayaran ang tanan nga kahalitan sang AFP. Lima ka tuig lang nga magaluntad ang MCB, kag pagkatapos sini wala na sang mabaton ang mga biktima.