Upisyal na nga natapos ang Balikatan 39-24 sadtong Mayo 10, apang yara pa gihapon sa Pilipinas ang linibo nga mga suldado nga Amerikano para sa ikaduha nga serye sang Salaknib-24 nga una na nga ginlunsar sadtong Abril. Madamo pa sang nagsunod nga mga war games ang “malinong” nga ginlunsar sang US sa pungsod. Yara pa gihapon sa pungsod ang mga suldado nga Australian para sa Kasangga exercise.

Sadtong Mayo 11, ginlunsar ang Salaknib sa banwa sang Basco, Batanes. Sa tabon sang “port improvement project” ginsugdan sang US Army kag Philippine Army ang paghakot sang bato halin sa Basco Port. Ginatanyag nga “civilian port” ang nasambit nga pantalan nga sa kamatuoran ang nagserbe nga dulungkaan sang mga barko pang-gyera sang US. Dugang ang dulungkaan sa iban pa nga pasilidad nga gintukod sang US sa Chadpidan, Basco kag sa San Rafael, Itbayat kag Mavulis Island.

Kadungan sini, ginsugdan ang Kasangga war games sa tunga sang Philippine Army kag Australian Defense Forces nga gintambungan sang 100 ka tropang Pilipino kag 50 ka suldado nga Australian sadtong Mayo 13 sa hedkwarters sang 5th ID sa Gamu, Isabela, nga magadugay tubtob Hunyo 21.

Kabahin sang war games nga ini ang pagbuya sang mga mortar kag drone operations nga nagatuga sang kinagamo sa mga kabalayan, kag “pagbato sa terorismo” nga nagapanguna nagahatag duot sa pagpamintas sa mga mangunguma kag aktibista.

Samtang, igalunsar sang US ang RimPac war games sa nagkalain-lain nga bahin sang Asia kag US halin Hunyo 29 tubtob Agosto 4. Gintawag nga “pinakadako nga naval war games” sa bilog nga kalibutan ang RimPac (Rim of the Pacific). Magatambong diri ang Pilipinas.

Kontra-Balikatan 39-24

Sa pagtapos sang Balikatan sadtong Mayo 10, nagsunog sang bandera sang imperyalistang US ang mga nagkalain-lain nga grupo sa atubang sang hedkwarters sang AFP sa Camp Aguinaldo, Quezon City. Gintumod nila ang paglapas sang US sa soberanya sang Pilipinas, mga paglapas sini sa tawhanon nga kinamatarung, kag pag-guyod sa Pilipinas sa ginapadihot sini nga gyera sa kasumpong nga imperyalistang China. Nagsab-it man sang mga istremer ang mga grupo sa Ilocos Norte sadtong Mayo 6.

Samtang, ginlunsar sang Kabataang Makabayan (KM) sa pungsod Australia kag Katipunan ng mga Gurong Makabayan (Kaguma) ang tagsa-tagsa ka mga aktibidad para sawayon ang Balikatan. Ginpintahan sang KM ang konsulado sang US sa Melbourne sadtong una nga semana sang Mayo.

Samtang, nagsab-it sang dako nga istremer ang mga katapo sang Kaguma sa isa ka taytay sa Malibay, Pasay sadtong Mayo 10. Nakasulat diri ang “Batuan ang imperyalista nga gyera! Isulong ang demokratiko nga rebolusyon sang banwa!”