1) Ti Visiting Forces Agreement wenno VFA ket maysa a bangbangir a katulagan militar a mangipalpalubos iti awan-lapped ken awan-patingga na a panagruar-serrek dagiti tropa, lugan ken ramit-militar iti US iti Pilipinas. Daytoy ket napasingkedan idi Mayo 27, 1999 kalpasan a ratipikaan iti Senado iti sidong ti panagturay ti rehimen Joseph Estrada.

2) Binukel ti VFA mano tawen kalpasan a nagpatingga ken winaswas ti Senado ti Military Bases Agreement idi 1991. Babaen iti VFA, naaddaan ti US iti karbengan a sumrek iti aniaman a paset iti kadagaan, taaw ken tangatang iti Pilipinas. Intransporma na daytoy ti pagilian kas maysa a dakkel a base militar.

3) Gamat ti VFA iti panangibaddek ti US iti soberanya ti Pilipinas gapu ta palpalubusan na daytoy nga aramaten ti Pilipinas kas base iti maysa a ganggannaet a pwersa. Babaen iti VFA, napagtalinaed ti US ti agnanayon a presensya dagiti rinib-ribu a pwersa na iti naduma-duma a suli iti pagilian ken dagiti nakapalawlaw a taaw, tapno makibiang kadagiti panguneg nga usapin iti pagilian.

4) Bigbigbigen ti gobyerno iti Pilipinas ti VFA kas katulagan gapu ta rinatipikahan daytoy iti Senado iti botos nga 18-5. Iti bangir a benneg, daytoy ket ehekutibo a katulagaan laeng para iti US. Saan daytoy a rinatipikahan ti Senado da, ken ti Kongreso da ket bigbigbigen laeng daytoy babaen iti Case-Zablocki Act. Ad-adu a probisyon na ti mangpabpabor kadagiti tropa nga Amerikano, ken disbentahe iti Pilipinas ken dagiti tropa a Pilipino.

5) Iti sidong ti VFA, amin a tropa nga Amerikano ket awtomatiko a makalisi kadagiti regulasyon kanaig iti passport ken panangala iti visa tapno makaserrek iti Pilipinas. Iti kasinumbangir na, kasapulan met dagiti tropa a Pilipino a mangala iti visa tapno makaserrek idiay US, ken adda karbengan ti US nga agkedked.

6) Amin a ramit, serbisyo ken tagilako, militar man wenno saan, nga itugot ti US iti Pilipinas ket saan a mabuwisan. Iti kasinumbangir na, amin a ramit nga itugot dagiti Pilipino a tropa idiay US ket maikkan iti maiparbeng a buwis segun iti linteg ti US.

7) Iti sidong ti VFA, dagiti tropa nga Amerikano nga um-umay iti pagilian ket saan nga awtomatiko a saklaw iti hurisdiksyon dagiti lokal a pulis ken dagiti korte iti Pilipinas. Nu adda panaglabsing iti maysa a soldado nga Amerikano kadagiti lokal a linteg iti Pilipinas, kasapulan pay a kiddawen ti gobyerno ti pammalubos ti US nga ited ti hurisdiksyon iti nakuna a nagbasol.

Nagbalin daytoy a lisensya para kadagiti tropa nga Amerikano tapno dursok nga agaramid kadagiti krimen kas iti panangkabil, panangrames, ken pammapatay. Karaman kadagitoy a krimen ti pammapatay ti maysa a soldado nga Amerikano iti transwoman a ni Jennifer Laude idi 2014 ken ti panangrames iti Pilipina a ni “Nicole” idi 2005.

8) Adda ti karbengan dagiti militar ti US nga idisiplina dagiti tropa a Pilipino ken kiddawen iti militar iti Pilipinas nga ited kadakuada ti hurisdiksyon tapno ibista ken ibalud dagiti nagbasol a tropa a Pilipino. Dagiti Pilipino a masentensyaan a nagbasol iti US ket maipauneg kadagiti linteg ti US ken mabalud kadagiti pagbaludan iti US. Ditoy Pilipinas, dagiti nagbasol a tropa nga Amerikano ket maipupok kadagiti espesyal a pasdek a pagnumoan iti US ken Pilipinas.

9) Ti VFA ket karaman kadagiti bangbangir a katulagan militar nga ar-aramaten ti US tatta tapno guyoden dagiti Pilipino iti durdurogan na gerra laban iti China.

10) Idi 2014, kasilpo iti VFA, pirmiaan iti Enhanced Defense Cooperation Agreement a naglehitimisa iti agnanayon a presensya militar agiti tropa nga Amerikano ken dagiti ramit-militar da iti uneg dagiti kampo militar ti AFP.

Adda itan iti saan a bumababa iti siyam a “nagnumoan a lokasyon” iti Pilipinas nu sadinno ket adda ti base militar iti US. Nalusotan na daytoy ti rekisito a panagala iti 2/3 botos manipud iti Senado para iti pangmabayagan a panagindeg dagiti ganggannaet a tropa iti Pilipinas.

11) Babaen iti VFA, nawaya dagiti tropa nga Amerikano nga agdakiwas kadagiti Pilipino a komunidad ken makibiang kadagiti sibil-militar ken kombat nga operasyon iti Armed Forces of the Philippines.
Malasin dagitoy kadagiti aginkukuna a sibil-militar nga operasyon ken dagiti war games kas iti Balikatan. Naibutaktak met ti limed a presensya da kadagiti internal a panseguridad nga operasyon kas iti napasamak idiay Mamasapano idi 2015.

12) Ipapaidam ti VFA ti karbengan iti Pilipino nga estado a mangammo kadagiti aktibidad dagiti tropa ti US, kasta met dagiti iserserrek na a ramit, karaman dagiti napeggad a nukleyar nga armas. Ik-ikkan wayawaya na daytoy dagiti tropa nga Amerikano tapno gundawayan ken gamruden dagiti natural a rekusro iti pagilian ken saan a bigbigen ti karbengan ken kabiagan dagiti Pilipino kadagiti panagsanay, panagindeg ken panagliwliwa da.