DOWNLOAD Ti Komite Sentral iti Partido Komunista iti Pilipinas ket nabiit pay a nangideklara iti Bulan ti Panagkaykaysa (Hunyo 20-Hulyo 20) iti pannakidangadang ti umili nga Indian, nangruna dagiti Adivasi a masa a kontra iti Operation Kagaar. Mainaig iti daytoy, ti Kawanihan iti Impormasyon ket mangiruar iti daytoy a praymer tapno maipakaammo kadagiti amin a kameng ti Partido, rebolusyonaryo a puersa ken umili a Pilipino ti pasista a kinaayup iti terorista a turay ni Modi idiay India.

Ti deklarasyon ti Komite Sentral ket sungbat iti panawagan iti Communist Party of India (Maoist) ken ti sangalubongan a grupo a mangsupsuporta iti daytoy nga International Committee to Support the People’s War in India (ICSPWI) para iti maysa a kampanya a panangsuppiat iti Operation Kagaar ken panangsuporta iti pannakilaban dagiti umili nga Adivasi, ken ti panangitandudo iti gubat iti umili idiay India kas kangrunaan a porma iti panangpaay iti kampanya iti panangparmek.

I. Ania ti Operation Kagaar?

Ti Operation Kagaar ket maysa a militar nga operasyon nga ipatpatungpal iti reaksyonaryo a sentral ken estado a gobyerno ti India. Nangrugi a maipatungpal dayta idi Enero iti paset ti Central India maibusor iti armado a pannakidangadang nga idadauloan ti Communist Party of India (Maoist). Paset daytoy iti nasaknap a kontra-insurhensya nga operasyon nga Operation SAMADHAN-Prahar a nairugi idi 2017.

Ti literal a kaipapanan ti sao a kagaar ket “panungpalan.” Segun iti estado ti India, ti panggep na ket gibusan ti armado a rebolusyonaryo a tignayan dagiti umili ti India.

Nangnangruna, ti operasyon ket nakasentro idiay Abujhmaad (Maad), maysa a kabambantayan ken kabakiran a rehiyon iti abagatan ti estado ti Chhattisgarh, a naawagan iti “kuta dagiti Maoista.” Ti Maad ket paset iti dakdakkel a kabakiran ti Dandakaranya a sakop dagiti estado ti Chhattisgarh, Odisha, Telangana, ken Andhra Pradesh idiay Central India. Kaaduan kadagiti agnanaed iti daytoy a rehiyon ket Adivasi wenno katutubo nga Indian.

Iti umuna a panagranggas ti Operation Kagaar idi Enero, pinatignay ti gobyerno ti India ti 10,000 puersa a paramilitar. Ti 3,000 kadagitoy ket naggapu iti dadduma pay nga estado iti India tapno igabor idiay Maad. Naipakat da iti innem a paramilitar a kampo iti dayta a lugar. Gapu na, adda tallo a paramilitar iti kada pito a lokal a residente.

Iti sidong ti operasyon, di kumurang a 130 sibilyan ken rebolusyonaryo ti pinatay ti estado ti India manipud Enero agingga iti Mayo daytoy a tawen. Nalawag a salungasingen na ti international humanitarian law, dagiti paglintegan iti gubat ken dagiti naisangsangayan a salaknib para kadagiti bulnerable a sektor iti lugar ti armado a risiris.

II. Dagiti Adivasi ken ti pannakisaranget da

Iti linged ti panangparmek kadagiti Maoista, ti Operation Kagaar ket mangpunpuntirya kadagiti amin a partido, organisasyon ken indibidual nga agsasao ken tumaktakder maibusor iti estado. Dagiti kangrunaan a biktima ket dagiti umili nga Adivasi, nga adun a dekada a makidangdangadang tapno masalakniban ti aglawlaw, ti daga dagiti inapo ken ti pagbiagan da.

Nasurok 8% iti dagup a populasyon ti India (104.2 milyon wenno agarup a kas kadakkel ti populasyon ti Pilipinas) ket Adivasi. Dagitoy ket nailian a minorya a buklen iti nasurok 600 katutubo a tribu a kaaduan ket adda idiay Central India. Dagiti Adivasi ket agnanaed kadagiti kabakiran (nga agdagup iti ingkapat iti intero a teritoryo ti India) nu sadinno a naigalut iti kabiagan da.

Ti nainsigudan a daga dagiti Adivasi ket nabaknang iti landok, gambang, balitok, zinc, plomo, manganese, chromite ken bauxite. Dakkel a paset dagiti kabakiran da ti paggapuan ti troso, ken dadduma pay a produkto a kayo. Maus-usar met dayta kas pagpasturan ken pagmulaan dagiti dadakkel a plantasyon.

Idi man pay, ti reaksyonaryo nga estado ti India ti nangipakat iti henosidyo kadagiti Adivasi. Nairekord ti saanen a mabilang a kaso iti pannangpadisi kadakuada, pananggamgam iti daga da ken panagserrek ditoy dagiti dadakkel a korporasyon. Lalo a kimmaro daytoy iti sidong iti pasismo a Brahmanic Hindutva (pasismo kadagiti minorya a relihiyon ken nababbaba a grupo a pangkagimongan) ti rehimen ni Narendra Modi.

Ti Operation Kagaar idiay Central India ket katupag ti korporasyon ken ti iseserrek dagiti dadakkel a kompanya iti nabaknang a kabakiran ti India. Laplapdan daytoy ti pannakidangadang iti umili tapno ikkan-waya ti pananggamrud dagiti ganggannaet a korporasyon kadagiti natural a kinabaknang iti pagilian.

III. Dagiti kaso iti panaglabsing
ti karbengan-tao

Iti napalabas a lima a bulan, nairekord dagiti demokratiko nga organisasyon ti 130 biktima iti ekstrahudisyal a pammapatay wenno agarup pito kada lawas. Adu kadagiti kaso iti pammapatay ti naipablaak nga “engkwentro” kontra iti People’s Liberation Guerrilla Army (PLGA) ti CPI (Maoist).

Agtutuon met laeng dagiti kaso ti panangaresto, panangrames kadagiti babbai, pwersado a panangpasuko kas Maoista, dursok a panagpaltopaltog, panagbomba ken dadduma pay a panaglabsing iti karbengan-tao ti nairekord iti nagan ti Operation Kagaar. Dagiti sumaganad ti sumagmamano kadagiti kangrunaan a kaso:

• Enero 1: Pammapatay iti 6-bulan a maladaga babaen iti panangpatudo iti bala dagiti puersa ti estado ti India idiay Bijapur, Chhattisgarh
• Enero 16: Panagdukot ken pannakapapatay ti tallo nga Adivasi idiay Nendra, Bijapur, Chhattisgarh
• Enero 30: Panangpaltog ken pannakapapatay ti maysa nga Adivasi idiay Bodga, Bastar, Chhattisgarh
• Marso 27: Pannakaaresto ken panangpapatay iti innem nga Adivasi iti kabakiran ti Chipurbhatti, Bijapur, Chhattisgarh
• Abril 2: Panangrames ken panangpapatay iti maysa a bengngeg a babai nga Adivasi idiay Nendra, Bijapur, Chhattisgarh
• Abril 7: Aerial bombing babaen kadagiti drone idiay Bastar, Chhattisgarh
• Abril 7: Panangbomba dagiti puersa militar kadagiti komunidad iti nagbeddengan ti Bijapur ken Sukma a distrito ti Chhattisgarh
• Abril 16: Pannakaaresto ken pannakapapatay iti 17 di-armado ken nasugatan a rebolusyonaryo idiay Aapatola-Kalpar, distrito ti Kanker, Chhattisgarh
• Abril 30: Pannakaaresto ken panangpapatay iti 66-anyos a lider-rebolusyonaryo ti CPI (Maoist) ken pammapatay iti uppat nga Adivasi idiay Kakur-Tekametta iti nagbeddengan ti Chhattisgarh ken Maharashtra
• Mayo 11: Panagmasaker iti 12 Adivasi a mangal-ala iti bulong ti tendu (maus-usar a pangbalkot iti sigarilyo) idiay Bijabur, Chhattisgarh
• Mayo 12: Pannakatay iti dua nga ubbing ken nadangran ti adu pay a tattao iti panagbettak ti maysa a nasagid a bala ti mortar a pinanawan dagiti paramilitar idiay Odspara, Bijapur, Chhattisgarh
• Mayo 13: Pammapatay iti tallo a mannakigubat ti PLGA iti peke a pannakiranget idiay Kathrangatta, distrito ti Gadchilori, Maharashtra
• Mayo 14: Panangibalud iti 30 aktibista, balo ti biktima, ken pamilya a mapan koma mangala kadagiti bangkay ti biktima idi Mayo 11 idiay Bijapur, Chhattisgarh. Inparang ida a “surenderi a Maoista” tapno maala ti gungguna a kwarta.
• Mayo 24: Pannakaaresto ken pannakapapatay ti walo nga Adivasi a mannalon idiay Rekavaya iti nagbeddengan ti Bijapur ken Narayanpur a distrito ti Chhattisgarh. Maysa pay a mannalon ti nasugatan.

IV. Pannakisaranget dagiti umili

Iti sangoanan iti pasista nga atake ken pananglapped iti estado ti India, agtultuloy ken situtured a lumablaban dagiti Adivasi, dagiti mangsalsalaknib iti karbengan-tao ken dagiti demokratiko nga organisasyon. Pappapigsaen da dagiti kampanya tapno patakyasen dagiti kampo-militar iti komunidad da babaen kadagiti barikada ken protesta a masa.

Dagiti organisasyon manipud iti sabali nga estado ken sentro ti India ket agirusrussuat kadagiti fact-finding missions kadagiti komunidad a rarauten ti militar tapno maipalgak dagiti krimen ti estado ti India. Nagprotesta dagiti estudyante ken mannursuro iti sentro ti India idiay Delhi tapno ipakaammo iti ad-adu nga agtutubo ken umili maipapan kadagiti panaglabsing iti karbengan-tao.

Kagiddan dagitoy, agipingpinget ti PLGA ken ti CPI (Maoist) tapno dupraken ken puntaan dagiti pasista a tropa ken puersa ti estado ti India. Karaman iti dayta ti pannakapapatay ti di bumaba a 35 kameng ti Central Armed Police Force (CAPF) ken ti espesyal nga yunit a COBRA (Combat Battalion for Resolute Action) iti reyd ti PLGA iti kampo idiay Darmavaram, Pamed, Bijapur, Chhattisgarh idi Enero 16. Laksid iti dayta, 40 pay a pulis ti nakaro ti pannakadangran da iti panangraut.

Rinaut met dagiti rebolusyonaryo idi Pebrero 1 ti pannakabangon ti rangtay idiay Maad, iti distrito ti Narayanpur, Chhattisgarh. Pinaralisa dagiti gerilya ti maysa a traktora, maysa a tanker, ken concrete mixer. Ti pannakaibangon ti rangtay, a kas iti dadduma pay a “progreso a proyekto” idiay Maad, ket manglukat iti dalan para kadagiti dadakkel a korporasyon a manggamrud kadagiti natural a kinabaknang iti dayta a lugar.

Ti PLGA ken ti CPI (Maoist) ket nasinged a kakadua dagiti Adivasi iti Central India iti biag ken ipapatay a pannakidangadang para iti aglawlaw, daga ken ti pagbiagan da.

V. Sumagmamano a rekord iti pakasaritaan ti kampanya a kontra-insurhensiya idiay India*

2005: Panangipatungpal iti Salwa Judum

Ti estado ti India ket nangbukel kadagiti milisya a Salwa Judum (kampanya a panangdalus) kadagiti lokal nga Adivasi idiay Bastar, Chhattisgarh iti nagan ti pananglaban kadagiti Maoista. Nangpataud dayta iti terorismo kadagiti komunidad a pakairamanan ti adu a kaso ti panangrames, panangpuor kadagiti balay, ken panangpapatay.

2009: Panangirugi ti Operation Green Hunt

Nangipatungpal daytoy iti babaro a tukad iti kampanya a kontra-insurhensiya nu sadinno ket inaramat ti estado iti India dagiti panagsanay ken taktika ti imperyalista nga US. Impatungpal iti daytoy ti estratehiya iti “panangriing iti puso ken panunot” dagiti Indian, nga iti aktwal ket pinairteng a pananglapped. Panggep na a parmeken dagiti tignayan a mangsupsupiat ken makisarsaranget iti pananggamrud kadagiti natural a kinabaknang ti India. Dayta ti nangpalubos iti iseserrek kadagiti dadakkel a ganggannaet ken lokal a korporasyon kadagiti nabaknang a rehiyon ti pagilian.

2011: Pannakaiparit iti Salwa Judum

Imparit ti Korte Suprema ti India ti panagraira dagiti suportado ti estado a vigilante a milisya a Salwa Judum ken binigbig dagiti panagpuor kadagiti komunidad, panangrames ken dagiti concentration camp para iti henosidyo daytoy. Napaneknekan daytoy dagiti agtutuun a panaglabsing iti karbengan-tao kadagiti Adivasi ken masa a mannalon.

2014: Pannakapaay ti Operation Green Hunt

Ti nakaro a kinaranggas ken dagiti agtutuon a panaglabsing kadagiti karbengan-tao iti Operation Green Hunt ket naan-anay a naipalgak. Napigsa ti nagbalin a kampanya dagiti demokratiko nga organisasyon a nangsupiat iti daytoy.

2015: Baro nga eksperimento iti kabambantayan iti Surjagarh

Nagipatungpal iti baro a serye iti korporatisasyon ken militarisasyon ti estado ti India iti kabambantayan iti Gadchiroli, Maharashtra. Tinarget daytoy dagiti kontra-minas ken pannakidangadang dagiti umili laban iti imperyalista a pananggamrud.

2017: Operation SAMADHAN-Prahar

Impatungpal ti baro a kampanya a kontra-insurhensiya nga Operation SAMADHAN-Prahar. Panangpalawa daytoy iti eksperimento a Surjagarh kadagiti rehiyon ti India nga adda nalabon a nainsigudan a kinabaknang.

2018: Pannakaaresto iti Bhima Koregaon-16

Adu a panagaresto kadagiti 16 aktibista, propesyonal, ken mangilablaban kadagiti karbengan-tao ken dagiti minorya nga umili mainaig iti kaso a Bhima-Koregon. Inraman ida iti napasamak a “riribuk” iti maysa a miting idi Disyembre 2017 idiay Bhima Koregaon, distrito iti Pune district iti Maharashtra. Nausar kadakuada ti Unlawful Activities (Prevention) Act a nabaliwan ken mas pinarungsot idi 2019. Rugi daytoy kadagiti agsasaruno a panagatake maibusor iti asinoman a tumaktakder ken agsasao maibusor iti estado.

2021: Umuna a naireport a kaso iti aerial bombing

Nairehistro iti umuna a gundaway idiay India ti panagusar ti estado kadagiti aramid-Israel a drone a mangitinnag kadagiti bomba kadagiti komunidad dagiti Adivasi. Adu a kaso iti aerial bombing ti nairekord kasaruno daytoy.

2022: Panangbukel iti Surajkund Scheme

Nabukel ti Surajkund Scheme iti miting dagiti mangidadaulo a burukrata ti India idi Oktubre 2022 idiay Surajkund, estado ti Haryana. Daytoy ket resulta iti panangragop ti reaksyonaryo nga estado ti India iti 5-tawen a pannakaipatungpal ti Operation SAMADHAN-Prahar. Pinalawa daytoy ti pannakaipatungpal iti Operation SAMADHAN-Prahar ken inaramid nga opisyal ti panangusar ti aerial bombing kontra kadagiti komunidad ti Adivasi, kangrunaan idiay Bastar.

Inaramid daytoy a target, saan laeng dagiti “komunista” nu di ket dagiti binirngasan na a “terorista” ken “organisado a krimen.” Inusar daytoy ti rehimen a Brahmanic Hindutva tapno puntiryaen dagiti Maoista, oposisyon, dagiti muslim ken kalaban iti politika.

2024: Panangipatungpal iti Operation Kagaar

Nangrugi nga impatungpal ti Operation Kagaar idiay Abujhmaad iti sentral nga India.

* Manipud iti report ti Forum Against Corporatization and Militarization (FACAM)

__________
Insagana ti:

Kawanihan iti Impormasyon
Partido Komunista iti Pilipinas

Hunyo 2024