Sa mga komunidad palibot sa mga base militar sa US, o giilang “EDCA site” ug mga gilunsaran sa Balikatan 2024, kaylap ang kawalay pagtagad, disimpormasyon ug pagpamig-ot sa reaksyunaryong gubyerno ug militar sa US. Kini ang kongklusyon sa usa ka fact-finding mission nga gihimo sa Bayan-USA ug PINAS Peace mission sa Central Luzon, Ilocos Norte ug Marawi City. Gipubliko nila niadtong Hunyo 12 ang resulta sa 3-ka-semanang imbestigasyon.

Lakip sa mga nakaplagan sa delegasyon ang paghan-ok sa US sa gidudahang gamit-militar gawas sa gitakdang mga “EDCA site” ug pagpahimulos sa mga sundalong Amerikano sa mga rekurso sa masang Cagayanon; pagkunsabuhay sa mga pribadong kumpanya ug militar; walay pagpahimangno sa mga komunidad sa Ilocos ug Cagayan kung asa gilunsad ang Balikatan nga nagbunga og troma ug kalisang sa sibilyang populasyon; ug militarisasyon, pagpamig-ot ug Red-tagging sa mga komunidad nga nanalipud lamang sa ilang panginabuhian. Sa Marawi City, gipaambit sa mga lokal nga upisyal ang disimpormasyon kalabot sa ginatukod nga base militar ug “economic zone” duul sa “ground zero” gamit ang pondo sa EDCA.

Matud sa delegasyon, kining tanan hulga sa kagawasan sa mga Pilipino, ug angayang panubagon ang rehimeng Marcos, ingonman ang gubyerno sa US ilalum ni Joseph Biden sa kadaut sa dala niining militarismo sa pinakakabus nga sektor.