Giisnayp sa Bagong Hukbong Bayan (BHB)-Western Samar (Arnulfo Ortiz Command) ang mga sundalo sa 87th IB nga nagkampo sa Sityo San Pedro, Barangay Poblacion 3, San Jose de Buan, Samar niadtong Hunyo 9. Nagtaud og koral sulod sa sityo ang mga sundalo alang sa pagatukuron nilang detatsment dinhi.

Napatay sa isnayp si Corporal Marvin Calvintos. Gipaulanan og bala sa mga Pulang manggugubat ang mga sundalo nga nagresulta sa pagkasamad sa daghan kanila.

Isip balos, gipahimungtan sa mga sundalo ang mga sibilyang komunidad. Gikanyon nila ang mga bukid ug umahan duul sa sityo nga nagresulta og kahadlok sa mga mag-uuma. Mayorya sa mga mag-uuma ang wala nakatungha sa ilang kaingin. Ang uban natukmod nga magbakwit sa kahadlok nga maigo sa mga bomba.

Militarisado na ang San Pedro sugod pa lang sa tuig 2024. Nataho dinhi ang patung-patong nga mga paglapas sa tawhanong katungod.