Miresponde karon ang mga yunit ug kumand ilalum sa Bagong Hukbong Bayan (BHB)-Negros Island (Apolinario Gatmaitan Command) aron moabag ug motabang sa masang Negrosanon nga apektado sa pagbuto sa Bulkang Kanlaon. Mibuto ang bulkan niadtong Hunyo 3 ug nakasinati og pagbaha sa lahar gikan sa bulkan ang mga komunidad sa Central Negros niadtong Hunyo 6 bunga sa kusog nga pagbundak sa ulan nga misagol sa abo nga gibuga sa bulkan.

Dobleng paantus sa masang Negrosanon ang pagbuto sa Bulkang Kanlaon tungod kay wala pa sila nakabarog gikan sa dakung kadaut sa hulaw niadtong panahon sa El Niño.

Sa mga taho, mikabat na sa 15,511 pamilya (halos 50,000 katawo) sa 23 ka barangay ang apektado sa pagbuto sa bulkan niadtong Hunyo 18. Gibanabanang mokabat sa ₱10 milyon na ang kadaut nga gibunga niini sa sektor sa agrikultura.

Imbes nga kongkreto ug lehitimong tabang, nagpakitang-gilas lang ang rehimeng Marcos Jr sa pagpanghatad niini og dili sustenableng ayuda alang sa pagpamulitika niini ug propagandang militar. Taliwala sa katalagman, gideklara pa sa 303rd IBde nga dili niini ihunong ang mga operasyong kombat sa mga apektadong komunidad. Sa pipila ka higayon, gigamit pa sa mga sundalo ang pagpanghatag og ayuda aron pugos nga “pasurenderon” ang mga sibilyan.