Paglupok sang Bulkan Kanlaon, ginrespondehan sang BHB-Negros
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/06/Kanlaon-Lahar-1024x540.jpg )
Nagahulag subong ang mga yunit kag kumand sa idalom sang Bagong Hukbong Bayan (BHB)-Negros Island (Apolinario Gatmaitan Command) para respondehan kag magbulig sa masang Negrosanon nga apektado sang paglupok sang Bulkan Kanlaon. Naglupok ang bulkan sadtong Hunyo 3 kag nakaagum sang pagdaganas sang lahar halin sa bulkan ang mga komunidad sa Central Negros sadtong Hunyo 6 tuga sang mabaskog nga pagbubo sang ulan nga nagsamo sa abo nga ginbuga sang bulkan.
Doble nga pasakit sa masang Negrosanon ang paglupok sang Bulkan Kanlaon tungod wala pa sila nakabangon halin sa delubyo sang tig-ilinit sadtong panahon sang El Niño.
Sa mga balita, naglab-ot na sa 15,511 pamilya (halos 50,000 katawo) sa 23 ka barangay ang apektado sang paglupok sang bulkan sadtong Hunyo 18. Ginabulubanta nga naglab-ot sa ₱10 milyon na ang kahalitan nga gintuga sini sa agrikultura.
Sa baylo nga kongkreto kag lehitimo nga bulig, nagpakitang-gilas lang ang rehimen Marcos Jr sa paghatag sini sang indi sustenable nga ayuda para sa pamulitika sini kag propaganda militar. Sa tunga sang katalagman, gindeklarar pa sang 303rd IBde nga indi sini pag-untaton ang mga operasyon kombat sa mga apektado nga komunidad. Sa pila ka higayon, gingamit pa sang mga suldado ang pagpanagtag sang ayuda para pilit nga “pasungkaon” ang mga sibilyan.