Bag-ohay lang nga gigun-ob sa pagbaha ug pagdahili yuta ang National Capital Region ug daghang bahin sa Luzon, hangtud sa Visayas ug Mindanao, tungod sa ulan nga dala sa bagyo ug habagat. Midagayday ang tubig nga naggikan sa mga upaw nga bukid nga nagresulta sa mga pagdahili sa yuta, pag-awas sa mga mabaw nga sapa nga puno sa lapok, ug pagbaha sa lapad nga kaumahan sa kapatagan. Mitaas ang tubig sa kasyudaran tungod sa nagkayamukat nga imprastruktura ug reklamasyon nga mibara sa mga agianan sa tubig, ug tungod sa palpak nga sistema sa pagkontrol sa baha.

Mikabat 50 ang namatay ug minilyon ang nag-antus.Gatusan ka milyong piso ang balor sa nadaut nga mga balay ug kabtangan, imprastruktura, mga pananum ug panginabuhian sa masa. Subling nakita ang bulnerabilidad sa kalamidad sa minilyong masang kabus sa mga payag nga walay igong panagang sa hangin ug ulang dala sa mga bagyo.

Gibutyag sa malukpanong pagbaha nga haw-ang ug puro bakak ang gipanghinambog ni Marcos sa iyang State of Nation Address. Duha ka adlaw sa wala pa ang mga pagbaha, iyang giingon nga “andam na kaayo” ang iyang gubyerno sa bisan unsang bagyong moabot. Napamatud-an nga walay pulos ang gipanghambog nga 5,500 nga proyekto alang sa pagkontrol sa baha nga gigastusan sa iyang gubyerno og kapin sa ₱255 bilyon niadtong miaging tuig.

Sa milabayng mga tuig, nagkadaghan ug nagkagrabe ang kadaut sa kinabuhi ug panginabuhian sa katawhan tungod sa mga kalamidad. Resulta kini dili lamang sa mga pagbag-o sa klima nga nagdala og grabeng init o ulan, apan ilabi na sa grabeng kapalpakan ug pagpasagad sa reaksyunaryong estado. Labaw pang dakung kadaut sa kinabuhi ug panginabuhian sa masa ang gibunga sa padayong paghatag dalan sa rehimen ni Marcos sa walay hunong nga pagbungkag sa mga kalasangan ug pagpangawkaw sa kinaiyahan.

Diha-diha nga milihok ang mga pwersa sa Partido ug nasudnon-demokratikong kalihukan aron motabang sa masa atol sa kalamidad. Daghan kanila ang usab mga biktima usab sa pagbaha ug pagkaguba sa mga balay ug kabtangan. Ang ilang paspas nga pagresponde sa kalamidad nagpakita sa ilang pakigtambayayong sa masang naapektuhan, kaandamong molihok aron mapagaan ang kasakit nga giatubang sa masa, ug sa matngong pagpalihok ug pagtigum sa kusog sa masa.

Sa mga lugar nga naapektuhan, gipalihok ang tibuok makinarya sa Partido aron mangolekta ug tubig, pagkaon, sinina ug uban pang hinanaling panginahanglanon, ug makigtambayayong sa lain-laing ahensya ug mga organisasyon aron mahatod dayon kini sa mga apektado. Kadungan niini, gipataas ang pagsabot sa masa sa mga hinungdan sa kalamidad ug panginahanglan sa pagtinabangay aron hiniusang makabarog gikan sa kadaut ug magpanalipud sa ilang mga katungod.

Ang pagpakusog sa kalihukang masa ug pagpangulo d sa Partido ang yawe sa epektibong pag-atubang sa masa sa mga kalamidad. Sa pikas bahin, sa pag-atubang sa mga kalamidad, labaw pang mapakusog ang kalihukang masa ug mapalambo ang inisyatiba ug diwa sa hiniusang paglihok, pagtinabangay ug pagtambayayong sa masa. Asaman nag-antus ang masa, angay lamang nga anaa ang presensya sa Partido, mga rebolusyonaryo ug demokratikong organisasyong masa aron ipataas ang ilang kahimatngon ug kapasidad nga motubag sa mga kalamidad.

Angayang ipasabot nga sa pag-atubang sa kalamidad, kinahanglan ang pagtinabangay ug pagkig-unong, apan dili kini igo. Angayan usab nga ipataas ang katilingbanon ug pulitikanhong kahimatngon sa masa nga ang ilang pag-antus sa kalamidad dili yanong hinungdan sa dautang panahon o “silot sa Diyos” apan binuhatan sa mga langyawng kapitalista ug lokal nga hut-ong nga hakog sa bahandi nga nangawkaw sa kinaiyahan ug sa pondo sa katawhan.

Kinahanglang ipunting ang ilang atensyon sa pagsingil sa rehimeng US-Marcos ug tibuok reaksyunaryong estado sa mga palisiya ug kapalpak niini nga nagpagrabe sa epekto sa mga kalamidad ngadto sa masa. Kinahanglang batukan ang programa sa reaksyunaryong gubyerno nga naghatag-prayoridad sa mina, pagpalapad sa mga plantasyon, kumbersyon sa yuta para sa mga proyektong real estate, walag-too nga reklamasyon sa yuta, pagtukod sa mga megadam, ug uban pa.

Mas grabe pa, ginapahimuslan sa mga burukrata ang mga kalamidad aron makakwarta ug makapangurakot. Kinahanglang ibutyag ang kamatuoran nga walay malungtaron o pangkinatibuk-ang plano sa pagkontrol sa baha, ug batikuson ang gatusan ka bilyong pondo nga gigahin sa gubyerno sa mga proyektong “flood control” nga gikurakot lamang sa mga burukratang kapitalista ug kroni sa negosyo.

Kinahanglang molihok ang masa aron singilon ang reaksyunaryong gubyerno sa kadaut sa ilang kinabuhi, panginabuhian ug mga kabtangan tungod sa kapakyas niini sa katungdanan niining masiguro ang kaluwasan ug kaayohan sa katawhang Pilipino. Labaw pa sa ayuda, katilingbanong hustisya ang singgit sa katawhan.

Sa mga natarang gerilya, kinahanglang tukuron o pakusgon ang mga organo sa pulitikanhong gahum, kauban ang Bagong Hukbong Bayan, sa pagpatuman sa mga palisiya sa pagpanalipud sa kinaiyahan, pagdili sa magun-ubong mga proyekto ug pagsilot sa mga operasyong nanggun-ob sa mga bukid, lasang ug sapa, ug nangawkaw sa yuta sa masang mag-uuma ug minoryang katawhan. Angayang palihukon ang masa para sa pagpangandam sa mga umalabot pang kalamidad.

Ang bag-ohay nga kalamidad siguradong dili mao ang katapusan nga mohampak sa masa sa katawhang Pilipino. Sa banabana sa mga eksperto, magsugod ang penomenong La Niña taliwala sa tunga-tunga Agosto ug Oktubre, nga gilaumang magdala og grabeng pag-ulan. Labaw king magdala og kasakit sa masang Pilipino ilabina atubangan sa nagkagrabeng krisis, pagsaka sa presyo sa bugas, karne, utan ug uban pang pagkaon ug batakang mga panginahanglan, ug ubos kaayong suhulan ug kita sa katawhan.

Dakung hagit ug higayon ang ginaatubang nga krisis ug kalamidad aron pangulohan ug pakusgon sa Partido ang tibuok rebolusyonaryong kalihukan isip armas sa katawhan sa pagpanalipud sa ilang kaayuhan. Kinahanglang tibuok-kusog nga ihatag sa tanang kadre ug myembro sa Partido ang ilang kalantip ug kusog aron mogamot ug magpalapad sa han-ay sa masa, aron pukawon, organisahon ug palihukon ang katawhan isip labawng gamhanang pwersa nga motapos sa tanang delubyong dala sa madaugdaugon ug mapahimuslanong sistema.