Ginpatay sang mga soldado sang Armed Forces of the Philippines (AFP) ang tatlo ka sibilyan sa Negros Occidental kag Masbate sang nagligad nga mga semana. Ang Negros Occidental kag Masbate ang una kag ikaduha nga may pinakamadamo sang nalista nga biktima sang pagpatay sa idalom sang rehimen Marcos.

Sadtong Agosto 22, brutal nga ginpatay sang 94th IB ang mag-asawa nga sibilyan nga sila ni Marvin Incarnacion, 37, kag Jolina Martinez, 27, sa ila kamalig sa Sityo Pisok, Barangay Buenavista, Himamaylan City, Negros Occidental. Napatay sila sa mga igo sang bala sa ulo. Halos nga daw indi na makilala ang nawong ni Martinez tungod sa kagrabe sang pagpaniro.

Sadtong Setyembre 1, ginpatay sang 2nd IB ang 30-anyos nga mangunguma nga si Tata Bacutin sa Barangay Pili, Placer, Masbate sa panahon sang pag-igo sang Bagyong Enteng. Siya ang ika-33 nga biktima sang pampulitika nga pagpamatay sa prubinsya.

Ginapagwa nga mga Pulang hangaway nga napatay sa engkwentro ang mga biktima.

Blokeyo sa pagkaon. Sobra nga gutom kag perwisyo ang gintuga sang pila ka semana nga blokeyo sa pagkaon sang 80th IB kag 70th IB sa apat ka sityo sa Barangay Umiray, General Nakar, Quezon. Ginalambatan sang mga soldado ang mga sako sang bugas kag iban pa nga pagkaon para sa mga tindahan sa mga nasambit nga sityo tungod sa wala basehan nga pasibangod nga ang mga ini ang para sa Bagong Hukbong Bayan.

Pag-aresto. Gin-abdak sang mga pulis kag militar kag ginpasakaan sang himu-himo nga kaso nga kriminal sila ni Cirila Estrada, anay bilanggong pulitikal, kag Victor Pelayo sa Capiz sadtong Agosto 29. Wala sila gilayon ginpakita kag natultulan lang sang mga grupo sa tawhanon nga kinamatarung kag himata sa istasyon sang pulis sa Roxas City pagkatapos sang duha ka adlaw.

Sa Quezon, iligal nga gin-aresto sang mga pulis ang mangunguma sang lubi nga si Roberto Mendoza sadtong Setyembre 1 sa Barangay Silongin, San Francisco. Si Mendoza ang amay sang tigpangapin sang tawhanon nga kinamatarung nga si Lieshel Mendoza nga gina-ipit sang 85th IB. Ginwasak man sang mga pulis ang dingding sang iya nga kamalig pagkatapos ini nga ukayon.

Pagpang-ipit. Iligal nga ginkuha sang mga soldado sang 3rd Civil-Military Operations Battalion sang 3rd ID ang mga ngalan sang mga katapo kag upisyal sang Asosasyon sang Magagmay nga Mangingisda sa Santiago sa Barangay Santiago, Barotac Viejo, Iloilo sadtong Agosto 18. Sa Manila, ginbalita sa barangay ni Enrique Lozada Jr (Teng), tigpamaba sang Bayan-Manila, sadtong Agosto 19 ang sarbeylans sang pulis sa iya.