SA TUNGA SANG lapnagon nga gutom kag kapigaduhon, gin-anunsyo kahapon ni Gilbert Teodoro, tiglikom sang Department of Defense, ang plano sang Armed Forces of the Philippines (AFP) nga magbakal sang mga misayl kag 40 ka eroplano pang-gyera sa bili nga ₱300-₱400 bilyon. Pagabaklon ang mga ini halin sa mga Amerikano nga kumpaniya sang armas kag ila mga subsidyaryo.

Sa subong, ginahambal nga may 224 pangkahawaan nga salakyan pang-gyera ang AFP. Ginagamit ang mga ini sa mga patarasak nga pagpangbomba sa kalasangan kag mga sibilyan nga komunidad sa binuang nga katuyuan sang AFP nga “lutoson” ang rebolusyonaryo nga kahublagan.

Indi magnubo sa 60 ang nalista sang Ang Bayan nga mga kaso sang pagpangbomba, pagpangkanyon kag istraping halin Hulyo 2022 tubtob Hunyo 2024. Ang 32 diri ang aerial bombing ukon paghanghulog sang indi magnubo sa apat ka dalagko nga bomba gamit ang mga FA-50, Super Tucano kag mga pang-atake nga helikopter.

Pinakamadamo ang nalista nga pagpangbomba kag pagpang-istraping sa Bukidnon, pagkatapos sa Northern Samar, Abra, Kalinga, Cagayan kag Aurora. May yara man sang papangbomba sa Priental Mindoro, Western Samar, Misamis Oriental, Apayao, Surigao del Sur, Agusan del Norte, Iloilo, Negros Occidental, Quezon kag Camarines Sur, Nueva Vizcaya, Agusan del Sur, Zamboanga del Norte, Negros Oriental, Masbate kag Samar. Sa tanan nga higayon, kadungan sang mga pagpangbomba nga ini ang pagpangkanyon kag malaparan kag malawig nga operasyon kombat sang militar nga ginhalinan sang lapnagon nga pagpang-abuso kag mga paglapas sa kinamatarung sang mga sibilyan.