Sa Bacolod, naglunsar sang surpresa nga hublag ang United Negros Transport Coalition (UNTC) sa sulod sang city hall sang Bacolod City sadtong Agosto 28 para makigdayalogo kuntani sa mayor angot sa pagpauntat sa makidumuluong nga PUVMP (subong PTMP). Gin-atubang sila sang sanggunian nga nagpagwa sang resolusyon para ayuon sa LTFRB nga iatras ang programa kag ibalik ang indibidwal nga mga prangkisa pagkatapos sila pamatian.

Sadtong Setyembre 2-3, nagpiket sa upisina sang LTFRB Region 6 ang UNTC, upod ang mga grupo sang drayber sa Panay. Gindul-ong sang grupo ang resolusyon sang lokal nga gobyerno sang Bacolod City para iduso ang ahensya nga maghimo sang tikang.

Samtang, ginsumite sang Piston sadtong Agosto 28 ang isa ka petisyon nga may pirma sang 1,000 ka mga drayber nga gusto mag-atras sa mga konsolidado nga prangkisa nga napwersa sila nga sudlan.