Nagpatigayon sang panimbahon (liturgical celebration) ang National Council of Churches of the Philippines (NCCP) kag Philippine Ecumenical Peace Forum sadtong Setyembre 1 para dumdumon ang ika-32 nga tuig nga pagpirma sa The Hague Joint Declaration sang mga tiglawas sang National Democratic Front of the Philippines (NDFP) kag sang Government of the Republic of the Philippines (GRP) sa The Hague, Netherlands. Kaundan sang deklarasyon nga ini ang balayon sang negosasyon kag ang pasunod sang mga sustantibo nga adyenda para malab-ot ang makatarunganon kag pangmalawigon nga kalinong.

Antes sini, ginkundenar sang mga rebolusyonaryong pwersa ang pahayag ni Eduardo Año, National Security Adviser, nga naghambal nga indi niya makita nga madayon ang estoryahanay pangkalinong. Kabaliskaran ini sa pahayag nga nagsiling nga “positibo” ang rehimen Marcos nga magabunga ang estoryahanay sa isa ka “pinal nga kasugtanan.”

Sa atubang sang nagabungguanay nga senyales halin sa GRP, liwat nga ginpabakod sang NDFP ang kahandaon sini para sa estoryahanay bilang epektibo nga pamaagi para masabat ang mga ugat sang nagaluntad nga gyera sibil. Suno naman sa Partido Komunista ng Pilipinas, ang pagsulong sang estoryahanay ang lubos nga nakadepende sa kabaskog sang tingog sang pumuluyong Pilipino kag sa ululupod nila nga pagduso sa rehimen Marcos nga pamatian ang madugay na nga singgitan para sa matuod nga reporma sa duta kag pungsodnon nga industriyalisasyon kag ang demanda para tapuson ang mga pagpang-abuso sa tawhanon nga kinamatarung kag internasyunal nga makitawhanon nga laye.