Upat ka tuig na ang pag-antus sa katawhang Pilipino ubos sa itoy, paantus ug pasistang rehimeng Marcos. Bisan unsaon pa ang paningkamot og paghulagway ni Ferdinand Marcos Jr nga “lambo na” ang Pilipinas, dili niya matago ang kamatuuran nga nagkagrabi ang kahimtang sa nasud ug sa katawhang Pilipino. Wala’y hunong ang mga deklarasyon sa mga upisyal ni Marcos nga nabuntog na ang rebolusyonaryong armadong pagsukol, apan wala’y pili gihapon ang mga operasyong militar sa tanang natarang gerilya sa tibuok nasud. Padayong gipadilaab ni Marcos ang kalayo sa gubat sa katawhan.

Nagkagrabe ang kahimtang sa mga mamumuo, mag-uuma, mananagat ug uban pang batakang hut-ong ug sektor nga naglangkob sa mayorya sa katawhan. Sa pikas bahin, ang pipila ka nagharing hut-ong, kakunsabo ang imperyalismong US, nagpabuhong sa bahanding giangkon gikan sa pagpangdaugdaug ug pagpahimulos sa masang anak sa buhat, sa burukratikong korapsyon, pagpangawkaw sa natural nga bahandi, ug sa pagpangilog og yuta ug panginabuhian. Anaa sa ngilit ang kahilwasan sa tibuok nasud tungod sa pagtugot ni Marcos nga gamiton sa US ang Pilipinas isip dakong base militar.

Nikunhod ang panginabuhi sa katawhan taliwala sa pagsaka sa presyo sa lana, pagkaon ug mga matag-adlaw nga panginahanglan. Wala’y kapuslanan ang paaron-ingnong mga tikang ni Marcos, sama sa mga pasundayag sa pagpang-apod-apod og bugas ug ayuda. Ang suholan sa mga mamumuo ug sweldo sa ordinaryong mga empleyado wala pa sa katunga sa gikinahanglang bali aron mabuhing disente ang pamilya nga adunay lima ka myembro. Samot pa nalubong sa utang ang mga mag-uuma taliwala sa nagkadakong gasto sa produksyon ug panginabuhi.

Grabe ang krisis sa kawalay trabaho. Minilyon ang walay panginabuhian, ilabina ang mga kabatan-onan. Liboang mamumuong Pilipino ang adlaw-adlaw nga nigawas sa nasud aron mangita og trabaho. Resulta kini sa paghagsa sa lokal nga produksyon, pareho sa manupaktura ug agrikultura, gumikan sa todo nga liberalisasyon sa pag-import ug pagbaha sa mga langyawng produkto. Walay programa aron itukod ang lokal nga nasudnong industriya para sa produksyon sa mga batakang panginahanglan sa nasud. Samot gilubong ni Marcos ang Pilipinas sa utang.

Samtang nagkalisod ang katawhan, wala’y hunong ang panagbangi sa magkaribal nga mga paksyon alang sa kurakot ug gahum. Layo pa ang eleksyong 2028, apan nagsugod na ang maniobrahan ug dusoay. Aron babagan ang pagdagan ni Bise Presidente Sara Duterte, giduso sa kampong Marcos ang impeachment. Kini taliwala sa tinuod nga tinguha sa katawhan nga hustisya ug pagpanubag sa tanang nalambigit sa korapsyon ug pagpangawat sa pondo sa lungsod, ilabi na ang pinakataas nga upisyal ug utok sa burukrata-kapitalismo nga si Marcos.

Gilabwan ni Marcos ang tanang nangaging papet nga presidente sa pagpaka-itoy sa dikta ng imperyalismong US. Sa ekonomya, todo-hatag si Marcos og mga ganti ug pribilehiyo alang sa mga langyawng kapitalista. Sagunson ang pagpangilog og yuta alang sa mga plantasyon ug mga proyektong “renewable energy.” Samtang wala’y yuta nga gigahin para sa mga mag-uuma, giabrihan ni Marcos ang 1,620 ka ektaryang kayutaan alang sa “economic security zone” alang sa mga korporasyong Amerikano, ubos sa gambalay sa Pax Silica. Sa natarang militar, wala’y kapareho ang pagdako sa pwersang militar sa US sa sulod ug kadagatan sa Pilipinas, ubos sa gambalay sa pagpangandam sa imperyalistang gubat batok sa China. Buta nga gitugotan ni Marcos nga gamiton ang Pilipinas isip dakong base militar ug lunsaran sa gubat sa agresyon ug pagpanghilabot sa US. Wala’y pakialam si Marcos kung maguyod ug mag-antus ang mga Pilipino sa gubat nga ginapasiugda sa US.

Gisulsolan ug gidauban sa US ang pasistang panumpo sa Pilipinas aron sumpoon ang nagkadaiyang porma sa anti-imperyalistang pagsukol sa katawhang Pilipino—armado ug dili. Kapin sa usa ka bilyong dolyar ang gigahin sa US alang sa Armed Forces of the Philippines (AFP) sa sunod nga lima ka tuig. Todo-larga ang pagpanghilabot ug pagpanghulhog sa militar sa US sa gubat kontra-gerilya ug kampanyang pagpanumpo ug pagpahamtang sa balaod militar sa kabanikanhan, sa takuban sa Salaknib ug uban pang “military exercise.” Gisuplayan sa US ang mga yunit ng AFP og mga hinagiban ug uban pang kahimanan sa gagmayng mga operasyon sa desperasyon nga bungkagon ang padayong pagpalapad ug pagkaylap sa BHB.

Sa mata sa katawhan, ang rehimeng Marcos managsama sa wala’y kaparis nga korapsyon, kalisod ug kagutom sa masa, pagpaitoy-itoy sa mga langyaw, ug pasistang pagpanumpo. Sa lapad nga katawhan, tin-aw nga si Marcos ang nagrepresenta sa dunot ug karaan nang sistema nga gihari-harian sa imperyalistang US ug kakunsabong pipila ka nagharing hut-ong. Si Marcos karon ang numero unong nagtulod sa katawhang Pilipino nga mobarug ug sagubangon ang lisod nga dalan sa pagsukol.

Sa nagkadaiyang dapit sa nasud, nitungha ang mga pakigbisog sa masa aron panalipdan ang ilang yuta ug puy-anan, makabuhing suholan, sawayon ang korapsyon, patubagon ang mga nangawkaw, panalipdan ang ilang katungod, batukan ang pagguba sa kinaiyahan, iprotesta ang presensya sa mga langyaw nga tropa ug panalipdan ang kahilwasan sa nasud. Gitukod nila ang ilang mga organisasyon ug kolektibo silang milihok aron ipakigbisog ang ilang kaayohan ug ang interes sa tibuok katawhan.

Sa kabanikanhan, lig-on nga miuswag ug milapad ang armadong pakigbisog, sa paglapad sa mga sona ug natarang gerilya. Bisan asang lugar, mainitong gisugat sa masa ang mga Pulang manggugubat sa Bagong Hukbong Bayan, ug hugot nga gigakos isip matuod nilang Hukbo. Pinaagi sa BHB, milig-on ang kaisog sa lapad nga masang mag-uuma nga mobarog ug batokan ang pagpangabuso kanila sa mga nangilog og yuta kauban ang ilang mga binayarang pasista.

Taliwala sa nasinati nga pagpanumpo ug pagpangdaugdaug sa katawhang Pilipino, determinado ang Partido nga magsilbing pwersa nga anaa sa kinauyokan ug nagapanguna sa ilang pakigbisog aron tapuson ang pagpangdaugdaug, usbon ang ilang kapalaran ug itukod ang bag-ong nasud nga gawasnon ug demokratiko. Sa diwa sa kalihukang pagtul-id, ginahalad sa mga kadre ug myembro sa Partido ang ilang kaalam ug tibuok kusog alang sa tinguha sa katawhan. Bisan asa ang masa, lalom ug lapad nga migamot ang Partido aron giyahan sila sa pagbagtas sa dalan sa pagsukol.