Binatikos ng Pambansang Lakas ng Kilusang Mamamalakaya ng Pilipinas ngayong araw, Disyembre 27, ang desisyon ng Korte Suprema na pahintulutan ang komersyal na operasyon sa itinuturing na “municipal waters” o karagatang saklaw ng 15-kilometrong layo mula sa baybay.

Tugon ang desisyon sa petisyon ng Medicar Fishing Corporation na ideklarang “labag sa konstitusyon” ang paglimita ng pangingisda sa municipal waters sa maliliit na mamamalakaya (municipal fisherfolk) lamang. Una nang kinatigan ng Malabon Regional Court ang Medicar.

“Nakakagalit” ang desisyon dahil malinaw na nanaig dito ang boses ng malalaking negosyo sa paggamit ng tradisyunal na pangisdaan ng maliliit na mangingisda, anang Pamalakaya.

Ayon sa grupo, lubos nitong mapipinsala ang may dalawang milyong maliit na mamamalakaya sa buong bansa. Hindi kayang makipagkumpetisyon ng maliliit na mangingisda na gumagamit ng tradisyunal at manwal na mga pamamamaraan ng paghuli ng isda sa mga abante, at kadalasan ay mapaminsala, na mga kagamitan at teknolohiya ng komersyal na mangingisda, anito.

“Wala pa man ang desisyon ng Korte, laganap na ang operasyon ng mga commercial fishing vessels sa mga munisipal na pangisdaan, na isa sa mga dahilan ng pagkalugi ng mga maliliit na mangingisda,” pahayag ni Ronnel Arambulo, tagapangulo ng Pamalakaya. “Dahil sa abanteng kagamitan, mabilis na nasasaid ng mga malalaking barkong pangisda ang lahat ng klase ng yamang-dagat kumpara sa maliliit na mangingisda na relatibong atrasado ang kagamitan.”

“Tiyak na aani ng protesta mula sa mga maliliit na mangingisda ang desisyong ito, at igigiit namin ang pagkilala sa aming eksklusibong karapatan sa munisipal na pangisdaan,” ayon kay Arambulo.

Agad na nag-apela ang mga lokal na upisyal ng isang bayan sa baybayin ng Surigao del Norte na baligtarin ang desisyon ng Korte. Nagbabala ang lokal na gubyerno ng bayan ng Del Carmen sa prubinsya na magdudulot ang pagbubukas sa municipal waters ng dislokasyon ng maliliit na mangingisda sa kanilang lugar.

Higit dito, magdudulot ito ng gutom sa 65% ng kanilang populasyon na umaasa sa yamang dagat para sa kanilang pangangailangang protina. Ang Del Carmen ang pinakamalaking bayan sa isla ng Siargao.