Kinundena ng Ilocos Human Rights Alliance (IHRA)-Karapatan ang panibagong serye ng militarisasyon at pwersahang “pagpaparehistro” ng Philippine Army sa mga mangingisdang kasapi ng Timek ken Namnama Dagiti Babassit a Mangngalap ti La Union (TIMEK La Union) sa Barangay San Manuel Norte, Agoo, La Union. Ayon sa IHRA, malinaw sa mga mangingisda na modus lamang ang pagpaparehistro at sa katunayan ito ay “pwersahang pagpapasuko” sa kanila sa paratang na mga sumusuporta o kasapi ng mga rebolusyonaryong organisasyon.

Noong Enero 20, naiulat ang pag-iikot ng nakasibilyan na pitong tauhan ng Philippine Army sa nabanggit na barangay sa pangunguna ng isang “Captain Fernandez.” Dala-dala ng mga sundalo ang isang listahan na naglalaman ng 30 pangalan ng mga kasalukuyan at dating kasapi ng TIMEK La Union at pinaghahanap sila para “irehistro” ang kanilang samahan.

Bago nito, isang kilalang aset ng militar na nagngangalang Benjoe Trisinio ang iniulat na nagpapabalik-balik sa komunidad para pilitin ang mga myembro ng TIMEK La Union na pumunta sa barangay hall para kumuha ng “ayuda.” Ayon sa IHRA, si Trisinio ay notoryus sa panlalansi at pamimilit sa mga resdiente ng Barangay San Manuel Norte at iba pang baybay na barangay sa Agoo na “sumuko” sa balangkas ng “Balik-Loob Program” ng gubyerno.

Itinuturo ring sangkot si Trinsinio sa sapilitang “pagpapasuko” kay Teresita Miranda Villanueva, 41, residente ng Barangay San Manuel Norte at myembro ng TIMEK La Union. Nauna nang binatikos ng TIMEK La Union ang ganitong modus ng mga pwersa ng estado at kanilang ahente.

“Sa mga nakaraang taon ay naranasan ng aming organisasyon ang ganitong harassment kung saan pinipilit papirmahin ang mga myembro ng TIMEK sa oath of allegiance na animo’y nagkasala sila para sa pagtindig sa kanilang mga karapatan bilang mangingisda,” pagkukumpara ng grupo.

Idiniin ng grupo na walang batayan upang pasukuin ang mga myembro nila at iba pang pang-adbokasiyang organisasyon dahil karapatan ng mamamayan ang mag-organisa ng kanilang mga sarili ayon sa kanilang interes. Dagdag nila, isinasapanganib ng ganitong kalakaran ang buhay at kaligtasan ng katulad nilang karaniwang mamamayan.

“Nananawagan kami sa Commission on Human Rights na imbestigahan ang nagpapatuloy na pwersahan at pekeng kampanya ng pagpapasuko ng mga pwersa ng estado at kanilang mga ahente,” pahayag ng IHRA. Dapat umanong mapanagot at sampahan ng mga kasong kriminal at administratibo ang mga sangkot sa paglabag sa karapatang-tao na ito.