Perwisyo sa mamamayan at kalikasan ang muling paglulunsad ng live-fire exercises ng mga pwersang militar ng US at Pilipinas sa Barangay Canantong, Laur, Nueva Ecija noong Hulyo 7. Nagpakawala ng 20 rocket ang US sa tinaguriang PH-US Army Artillery Rocket System Subject Matter Expert Exchange (SMEE) gamit ang mga High Mobility Artillery Rocket System (HIMARS). Bago nito, naglunsad na rin ng kaparehong pagpapasabog ang US noong Marso, sa ilalim ng war game na Balikatan.

Ang Rocket SMEE ay bahagi ng PH-US Combined Exercise Salaknib 2023 na inilunsad para palakasin ang kontrol ng imperyalismong US sa papet na Armed Forces of the Philippines (AFP). Dumalo sa partikular na aktibidad bilang mga obserber ang humigit-kumulang 500 pwersang militar ng AFP.

Katulad na pagpapasabog ang inilunsad ng US at Pilipinas noong huling linggo ng Marso bilang bahagi ng Balikatan. Matatandaang binatikos ito ng grupo ng kababaihan na Gabriela na nakatanggap ng mga ulat mula sa mga residente sa lugar. Ayon sa grupo, matinding perwisyo ang naranasan ng mga residente kaugnay ng mga pagsabog na madalas naririnig sa gabi. Nakaapekto ito sa kanilang kilos at kanilang kakayahang makapaghanap-buhay.

Isinaad ng naturang ulat ng Gabriela na ang live fire exercises ay nagdulot ng labis na pagkabalisang mental at emosyonal hindi lamang sa mga tao sa mga apektadong komunidad kundi pati sa mga hayop sa paligid. Nagpahayag din ng pangamba ang grupo sa toxic waste na iniiwan ng gayong mga pagpapasabog.

Pagkatapos ng aktibidad noong Hulyo 7, ginawaran pa ng medalyon ng Honorable Order of Saint Barbara si Col. Hubert Acierto, Deputy Regiment Commander ng Army Artillery Regiment ng AFP, sa katapatan nito sa US.

Ang gawang-US na multiple rocket launcher ay ginagamit ng Ukraine sa gerang inudyukan ng US laban sa Russia. Sinabi kamakailan ni Philippine Army chief Lt. Gen. Romeo Brawner Jr na plano nitong bumili ng mga HIMARS, anti-ship cruise missiles at air-defense artillery sa darating na mga taon bilang bahagi ng AFP “modernization program” na kinokonsulta nito sa US.

Ang aktibidad na ito ay bahagi ng 500 aktibidad ng US na nakaplanong ilulunsad sa Pilipinas ngayong taon. Liban sa pagpapahigpit ng kontrol nito sa hukbo ng Pilipinas, layunin ng mga aktibidad na ito na bigyan-katwiran ang permanenteng presensya ng mga tropa ng US sa bansa.