Nagprotesta ang mga myembro ng Today’s Carolinian (TC) at mga grupong nagtataguyod ng kalayaan sa pamamahayag sa University of San Carlos (USC)-Talamban Campus sa Cebu noong Enero 21 para batikusin ang pagpapaalis ng pahayagan sa kanilang upisina. Sinipa ng administrasyon ng USC ang pahayagang pangkampus na TC sa upisina nito sa USC-Downtown Campus noong Enero 15.

Ayon sa TC, walang dayalogo at biglaan silang pinalayas sa bisa ng isang ipinaskil na “pabatid” noong Enero 17 sa labas ng ginagamit nilang upisina ng pahayagan. Nakasaad dito na papalitan sila ng Alumni Office simula Enero 15. Noong Agosto 2024 ay ipinasara rin ang upisina nito sa USC-Talamban Campus.

“Ang pagtatanggal sa upisina ng TC sa gitna ng matapang na pagtatanong ng mga estudyante hinggil sa pagtataas ng matrikula at iba pang mga bayarin ay malinaw na paglabag sa demokratikong karapatan ng mga estudyante at mga komunidad,” pahayag ni Brell Lacerna, pambansang tagapagsalita ng CEGP. Ayon sa CEGP, hindi ito ang unang pagkakataon na ginipit ng administrasyon ng USC ang TC.

Noong 2019, tinanggalan ng pondo ang pahayagan kasunod ng kanilang kritikal na paglalathala ng mga balita hinggil sa pagpapataw ng USC ng dagdag-singil sa matrikula. Pinipilit rin ng USC Office of Student Formation and Activities (OSFA) ang TC na magrehistro bilang isang “organisasyon sa paaralan” sa halip na kilalanin bilang isang pahayagan ng mga mag-aaral. Marami pang mga mapanupil na mga patakaran at pagbabawal na ipinataw ang USC sa TC at iba pang mga pahayagan sa unibersidad.

Nagpahayag ng mahigpit na suporta sa TC ang mga organisasyon sa loob ng USC. Kinilala nila ang boses ng TC at sinabing lagi itong nasa unahan ng pababalita ng katotohanan para sa mga estudyante na pinaglilingkuran nito. “Ang isang malaya at independyenteng pahayagan ay mahalaga sa pagkakamit ng katotohanan at pangangalaga sa pananagutan,” pahayag ng CEGP-Cebu.

Nakiisa rin sa TC ang mga mamamahayag ng Cebu. Hinimok ng National Union of Journalists of the Philippines (NUJP)-Cebu ang USC na ibalik ang mga espasyo sa TC at isabuhay ang itinataguyod na mga “core value” ng institusyon.

“Dapat nang matugunan ang matagal nang mga hinaing ng mga estudyante ng USC ngayon, at nakasalalay ito sa ating kolektibong pagtindig laban sa mapanupil na sistema ng edukasyon,” ayon kay Lacerna. Hamon niya sa administrasyon ng USC na makipagtulungan ito sa mga estudyante at iba pang sektor ng uniberisdad laluna sa usapin ng pagtataas ng matrikula, at pagkilala sa mga konseho ng mag-aaral at mga publikasyon bilang mga kinatawan ng komunidad nito.