Read in: English

Nauwat an mga residente han usa nga barangay ha Las Navas, Northern Samar nga tumambong han “peace rally” nga ginpangunahan han mga tropa han 20th Infantry Battalion para ha usa nga aktibo nga aset han militar ngan kriminal nga elemento, sigon ha report han New People’s Army-Northern Samar (Rodante Urtal Command o NPA-RUC).

Nagpatawag han asembleya an mga tropa han 20th IB nga naghihimo han Retooled Community Support Program (RCSP) ha dancing hall han barangay hadton Hunyo. Waray ig-anunsyo an adyenda han miting, sering han mga residente ha NPA-RUC.

Nahibaruan na la nira ha mismo nga programa nga usa ngay-an adto nga “peace rally” nga ginhimo han mga sundalo agud pagawason nga ginkukundenar an pagsirot han NPA-RUC hadton nakalabay nga bulan kan Jonie “Banong” Tortuna, barangay kagawad ngan tagapangulo han komite han barangay para ha peace and order. Ginpirit han mga sundalo an mga residente nga kumatin han mga gidaan na nga ginhimo nga mga plakard nga nagpapakaraot ha NPA.

Nagsering an NPA-RUC nga sukwahi ha ginapapgawas han 20th IB, diri ordinaryo nga sibilyan hi Tortuna. “Kalakip ha iya mga krimen kontra ha katawhan amo an pagserbe komo aktibo nga aset han 20th IB ngan an pagpatay ha duha nga inosente nga sibilyan. Usa hiya nga kontra-rebolsuyunaryo ngan kriminal nga elemento,” sering han NPA-RUC.

Kahuman patayon an nasering nga aset han militar, binulos an mga pasista nga tropa han estado ha mga residente han Brgy. Paco. Labot ha pag-uwat ha mga residente, gin-aresto liwat nira an kapitan han barangay ngan gindentiner hiya ha hedkwarters han pulis ha Las Navas. Temporaryo hiya nga ginbuhian.#