Una nga ginpalukpan sang Leonardo Panaligan Command-New People’s Army (LPC-NPA) ang nagahara-hara nga pasistang 62nd IB sa tuyo nga pag-raid sa nagapahuway nga tropa sang NPA sa isa ka balay sang pamilya Ramirez gikan sa malawig nga pagpanglakaton sadtong Mayo 20, 2023 pasado alas 5:00 sang kaagahon sa Sityo Napiluan, Brgy Quinten Remo, Moises Padilla, Negros Occidental. Resulta, apat ang killed-in-action (KIA) sa tropa sang 62nd IB. Suno sa mga saksi nga pumuluyo sa lugar, gin-agi ang apat ka mga bangkay sang pasistang tropa sa Brgy Sebukawan Proper, Isabela.

Samtang pilason si Alvin Bayno (Ka DAGGER), 20 anyos sang Sityo Caliban, Brgy Banog-banog, Isabela, Negros Occidental kag wala na sang ikasarang magbato apang desperado nga ginpatay sang mapintas nga tropa militar sandig sa polisiya sini nga “wala dakpon nga buhi sa NPA.”

Desperado man nga ginmasaker sang militar ang mag-asawa nga sanday Juliven Ramirez, 23 anyos kag Evelyn Meren, 31 anyos lunsay mga mangunguma sang Sityo Napiluan Brgy Quinten Remo. Pilason man si Ruben Obidas, 49 anyos, manunguma sang Sityo Nakuruhan, Brgy Quinten Remo, Moises Padilla. Si Ruben naigo sang bala gikan sa patarasak nga pagpaniro sang nasambit nga tropa militar kag hungod nga ginpatay sang militar si Obidas. Samtang si Julwar Loviano (Ka RYAN) 18 anyos sang Sityo Halog, Brgy Sandayao, Guihulngan City, nangin kaswalti man sang NPA sa ika-tatlo na nga hugna sang inaway samtang naga-atras.

Sa lain pa nga engkwentro sa Sityo Amumuyong, Brgy Trinidad, Guihulngan alas 5:00 sang kaagahon sa tunga sang NPA kag 16th Scout Ranger sa amo gihapon nga petsa Mayo 20, KIA ang isa ka katapo sang Scout Ranger. Na-martir ang mga Pulang hangaway sanday Cristito Nelles Jr (Ka Cris), 27 anyos sang Sityo Amumuyong, Brgy Trinidad, Guihulngan City kag si Rolly Benero (Ka MARNIE), 22 anyos sang Sityo Cambairan, Brgy Trinidad, Guihulngan sa amu nga engkwentro.

Samtang brutal naman nga ginpatay sang militar ang mag-amay nga sanday Antonio Babor, 77 kag Jurielen Babor, 27 anyos kag mga mangunguma sang nasambit nga lugar. Desperado nga gintamnan sang militar sang mga armas luthang ang mga biktima nga pamilya Babor para hinabunan ang palpak sini nga operasyon sa pagdugmok sa NPA sa Central Negros.

Padayon kag Isulong ang armadong paghimakas! Mabuhay ang mga rebolusyonaryong martir! Kamo ang amon inspirasyon upod sa malapad nga masang gina-alagaran!