Patay si Joselito Raboy, aktibo nga katapo sang Brgy. Montilla CAFGU Patrol Base idalum sa superbisyon sang 62nd IBPA. Septyembre 24, 2022, alas 12:00 sang udto, natabo ang madinalag-on nga partisan operation sang New People’s Army Leonardo Panaligan Command – Central Negros Front (LPC-NPA) sa Sityo Bayabasan, Brgy. Montilla, Moises Padilla, Negros Occidental.

Si CAFGU Joselito Raboy ang isa sa mga operative sang pasistang militar nga nagmasaker sa pamilya Jacolbe diin patay ang daycare worker nga si Cristina Jacolbe, ang 16 anyos nga si Everly Kee–pinalangga nga anak ni Cristina kag Ernie Jacolbe, upod kay Rodan Montero sang Sityo Banderahan, Brgy. Trinidad, Guihulngan City, Negros Oriental.

Upod man si Raboy sa tropa sang 62nd IBPA kag PNP-SAF sa pagrapido kag tuyo nga pagpatay kay Boyet Cezar kag Marjun Mahinay sang Sityo Kambairan, Brgy. Trinidad, Guihulngan City sadtong naglabay nga mga binulan sang Hulyo kag Agosto 2022. Si Raboy ang isa sa tatlo ka mga katapo sang CAFGU nga nagpangsaka-saka sa mga kabalayan sang Sityo Bayabasan, Brgy Montilla kag nagapamahug gamit ang ila mga armas-luthang sa ila ginapatu-patuan nga mga suporter sang NPA. Masupog man ini si Raboy nga tagpaniktik sang 62nd IBPA sa hulag sang NPA.

Ang natabo nga pagsilot sang LPC-NPA kay Joselito Raboy magserbe nga paandam sa tanan nga makinaryas kontra-hublag sang militar ilabe na ang kuno mga nagsurender nga nagpaggamit sa pasistang AFP, PNP kag NTF-Elcac katumbas sang pasalig nga kwarta diin nagtuga sang halit sa pangabuhian, kabuhi kag may utang nga dugo sa pumuluyo sa Central Negros.

Ang LPC-NPA ang wala duha-duha nga magpangita sang pamaagi sa pagsilot agud mapaluntad ang nagakaigo nga hustisya sa nga biktima sang pasismo sa estado.

Isulong ang inaway banwa tubtob sa kadalag-an!##