Sa kada bulan na lang may ginapalapta ang Armed Forces of the Philippines (AFP) kag #DiMasaligan79IB nga mga ‘narekober’ nga armas sa norte nga bahin sang Negros nga iya kuno sang rebolusyonaryong New People’s Army (NPA).

Sining bag-o lang, ginpangtikal nila ang pagkakuha sang isa ka Baby M16 kag isa ka magasin sini nga gintudlo kuno sang nagpalagyo nga Pulang hangaway sa perimetro sang encounter site sa Barangay Pinapugasan, Escalante City, Negros Occidental nga bag-o lang kuno nagsurender.

Kung madumduman, isa ka lehitimo nga engkwentro ang natabo sadtong Pebrero 21, sa Sityo Mansulao, Barangay Pinapugasan, sa nasambit nga syudad, apang ginpalawig sang #DiMasaligan79IB ang ‘sumpunganay’ tubtob isa ka semana bisan wala na sang presensya sang NPA sa erya. Mas ginpalawig pa ang ila pagtinir paagi sa ila ‘clearing operations’. Sa amo nga insidente, ginpagwa sang #DiMasaligan79IB nga narekober nila ang 16 ka matag-as nga armas (high-powered rifles o HPR) kag apat ka manugbo nga armas.

Sa bag-o nga pahina sang istorya nga ginapalapta sang #DiMasaligan79IB, pareho gin-angkon ni Lt. Col. Arnel Calaoagan, Commanding Officer sang #DiMasaligan79IB, nga wala serbe ang ila gintigayon nga clearing operations pagkatapos sang engkwentro sa sini nga bag-o nga rekoberi sa perimetro lang sang natabuan sadtong Pebrero 21. Sa sini nga bag-o nga report, maabot na sa 17 ka HPR ang ginadala-dala sang 7 ka bilog nga NPA sa engkwentro? Idungag pa sa apat ka manugbo nga armas nga nakuha nila. Buot silingon, ang isa ka Pulang hangaway ang magadala sang duha tubtob tatlo ka HPR, mga magasin kag bala, pagkaon, propaganda materials kag personal nga kagamitan?

Butigon kag naga-obra-obra lang sang istorya si Calaoagan para mapahamot siya sa ila burukrasya. Syempre, daw kagawian naman sang #DiMasaligan79IB ang mga peke nga ‘rekoberi’, planted nga ebidensya, peke nga engkwentro, peke nga surenderi. Pareho lang sila sang ila commander-in-chief nga si Bongbong Marcos nga sining bag-o lang nagsiling sa iya SONA sang puro kabutigan, mga pahayag nga tuman ka layo nga kahimtangan sang pumuluyo.

Umpisa Enero 2024 tubtob subong, nagreport ang #DiMasaligan79IB nga narekober ang 26 ka HPR kag 13 nga manugbo nga armas nga iya kuno sang rebolusyonaryong NPA. Kung matuod ini tanan, diin na ang mga ini subong? Maka-seguro bala ang publiko nga wala gina-recycle sang #DiMasaligan79IB ang ila mga narekober?

Tuig 2022 pa lang gindeklarar sang AFP nga nadismantol na ang Roselyn Jean Pelle Command-New People’s Army (RJPC-NPA), apang maobserbaran nga umpisa sang natabo ang engkwentro sa Pinapugasan, wala untat na ang mga armas nga narekober sa diin-diin nga banwa ukon syudad. Nagapakita lang ini sa tuman nga kadesperado sang #DiMasaligan79IB sa ila kapaslawan sa paglab-ot sang ila dedlayn kag para hatagan rason ang ila wala untat nga mga dalagkuan nga focused military operations.

Patihan sang mga unipormadong soldado ang gusto nila patihan: dismantol, surender, mga armas narekober. Sin-o man ang galagas sa promosyon ukon pasidungog? Kon imo lantawon, inaway sa propaganda man ini tanan. Ang kamatuoran amo nga ginakaugtan sang pumuluyo ang AFP nga dapat tani magadampig sa ila, apang sa subong, ang NPA nga matuod nga soldado sang pumuluyo amo ang ginasuportaan sa katawhan.###