Peke ang ginapabugal ni Col. Arevalo nga may 11 tanan ka NPA nga nagsurender sa probinsya. Ang masobra P200,000.00 nga ginrelease sang Department of Local Government (DILG), dugang naman nga pagpangurakot sang AFP ilabe na ni Col. Arevalo kag iban pa nga matag-as nga opisyal sang AFP.

Sa Central Negros, wala bisan isa ka NPA ang nagsurender. Intak kag pursigido nga nagatib-ong sang armadong rebolusyon sa kaumahan bilang una nga porma sang paghimakas sa pag-agaw sang gahum pulitika sa nagahari nga sahi. Isa ang panindugan, panan-awan kag metodo sa pag-atubang sa anu man nga porma sang pagpang-atake sang pasistang AFP. Solido kag hugot nga nagahiliusa ang LPC-NPA sa lig-on nga suporta sang malapad nga masa sa pag-amot agud rumpagon ang US-Duterte nga rehimen.

Sa baylo, halos masobra 70% ang pagdako sang katapuan sang NPA sa Central Negros halin sadtong bulan sang Oktubre 2018 tubtob temprano pa nga bahin sang Pebrero 2019. Nakalunsar sang 16 tanan ka mga taktikal nga opensiba sa nagkalain-lain nga porma. Kapin sa 34 (31 KIA kag 3 WIA) ang naagum nga kaswalti sang militar kag mga ahente sini.

Halos 5 ka aksyon militar ang malunsar sang NPA batok sa AFP sa kada bulan. Lima (5) man ka katapo sang AFP kag ahente sini ang mabuhin sa kada bulan kag 1-2 man ang AFP nga mahalitan sa kada adlaw. Kag labaw sa tanan, indi katulog ang pasistang AFP kag masami nga nagakurdam sa gulpi kag surpresa nga mga atake sang NPA. Pabilin nga reactive ang militar sa mga ginalunsar nga taktikal nga opensiba sang LPC-NPA kag kabaliskaran sa ginasugid ni Col. Arevalo nga “To Attack the NPA, before the NPA attacked us.” Samtang wala sang defensive action ang LPC-NPA nga naagum sa pihak sang tudo-atake sang 94th IB kag 62nd IBPA sa mga kaumahan sa Central Negros sa nasambit na nga panahon.

Desperado ang AFP kag PNP sa pagwasak sang CPP/NPA kag bug-os nga rebolusyonaryong hublag sa Central Negros. Lunsay mga inosenteng sibilyan ang 6 tanan nga ginpamatay sa sulod lamang sa 6 ka oras (gikan alas 5:00 sang kaagahon tubtob alas 10:00 sang aga sadtong Disyembre 27, 2018). Malapit 50 ang illegal nga ginpang-aresto paagi sa planted nga mga armas kag peke nga “warrant of arrests” kag “search warrants” sa ginlunsar nga Synchronized Enhanced Managing Police Operations (SEMPO)/Oplan Sauron sang AFP CenCom kag PNP Regional Office 7 sadtong Disyembre 27, 2018 sa Guihulngan. Ginpangransak sang AFP kag PNP upod sa force multiplier nga mga katapo sang BPAT kag Civil Defense ang mga kabalayan sang mga inosenteng mangunguma kag ginpangawat ang ila mga mga kwarta kag pagkabutang Madamo sang mga mangunguma nga nadislokar sa ila puluy-an kag palangabuhian. Halos ginatos ka pamilya ang nagbakwit kag mayoriya sang kabataan ang wala nakapadayon sang ila pag-eskwela bunga sang grabe nga kahadlok sa kapintas sang AFP, PNP BPAT kag Civil Defense sang Moises Padilla sa kaumahan sang Guihulngan City.

Kabutigan man ang ginasugid ni Arevalo nga gamiton ang una nga P200,000.00 nga gin-release sang DILG para sa pagkaon, transportasyon kag pagproseso sa mga papelis sang gina-alegar nga 11 ka mga NPA surrenderees sa probinsya. Kahibalo ang NPA nga “unliquidated” ini tanan nga kinaiya sang expenses sa Commission on Audit. Ini maathag nga korapsyon sang AFP kag kurakuton lamang ini sang mga matag-as nga opisyal sang AFP ilabe na ni Col. Arevalo sang 303rd Bde PA. Samtang ang mga rank and file nga mga katapo sang AFP kag PNP ang naga-antus sa pagsakripisyo bisan pa sa pagtaya sang ila kabuhi para lamang sa luho sang ila mga matag-as nga opisyal kag heneral.

Maathag man nga gingamit lamang ini nga mga personahe kag indibidwal lamang makasuyop naman sang pundo ang AFP kag PNP para sa ila kaugalingon nga interes kag kapritso.

Sgd: Ka JB Regalado
Spokesperson
Leonardo Panaligan Command
New Peoples Army
Central Negros Guerrilla Front