Atol sa pagsaulog sa International Human Rights Day, hugot nga ginakondena sa New People’s Army – Sultan Kudarat ang walay hunong ug niluog nga pagpanglapas sa katungod-tawo nga gibuhat sa Armed Forces of the Philippines (AFP) batok sa mga sibilyan, mag-uuma ug lumad sa probinsya gikan Enero hangtud Nobyembre 2020. Ang maong mga pagpanglapas resulta sa sustenido nga operasyong militar sa 37th IB, 7th IB, 6th IB ilalom sa 6th ID ug Special Action Forces sa PNP nga gi-direhe sa TASK FORCE CENTRAL ilalom sa Western Mindanao Command (WESTMINCOM) sa AFP batok sa rebolusyonaryong kalihukan ug sa katawhang nagsukol aron palayason ang kompanyang Consunji nga nangilog ug nangawkaw sa liboan ka ektaryang yutang kabilin sa mga Dulangan Manobo, Tiduray, Moro ug yuta sa mga settler.

Subay sa nakalap nga impormasyon sa NPA-Sultan Kudarat, mokabat sa kapin 2,600 ka pamilya ang biktima sa kaso sa Food and Economic Blockade, 5 indibidwal ang biktima sa Torture, 15 ka pamilya o kapin 60 indibidwal biktima sa pagsunog sa ilang balay ug Forced Evacuation, kapin 45 indibidwal ang biktima sa Threat, Harassment and Intimidation, 1 biktima sa Illegal Arrest and Detention, 2 ang biktima sa Physical Assault and/or Injury, 71 biktima sa Forced Surrender samtang 2 ang biktima sa Extrajudicial Killings ug uban pa.

Lakip sa maong mga kaso ang brutal nga pagpatay kay Milboy Dakula, 17 anyos, ug Dino Limboy, 23 anyos, sa mga bangis nga elemento sa 37th IB niadtong September 4, 2020 sa Brgy. Santa Clara, Kalamansig. Bisan ang adunay diperensiya sa panghuna-huna nga si Cris Macargas, 40 anyos, gigapos ug gibitay sa kahoy sa teroristang 37th IB niadtong September 5, 2020 sa mao gihapong barangay.

Gi-istraping usab sa tinapong tropa sa 37th IB, 7th IB ug SAF-PNP ang panimalay sa usa ka pamilya niadtong Oktubre 22, 2020 bandang alas 9:00 sa buntag sa Sitio Ebe, Brgy. Lagubang, Sen. Ninoy Aquino. Human niini giguba ang ilang balay ug mga gamit samtang gipangkuha ang himan panguma sama sa lagaraw ug atsa. Ayha ang maong insidente gitapok sa militar ang mga residente sa komunidad lakip na ang mga bata, tigulang ug buntis. Gipanghasi ug gipanghulga ang mga biktima nga pamatyon ug bombahan. Tungod sa kahadlok ug trauma sa maong mga binuhatan sa militar, nagkurog ug naka-ihi ang mga bata ug tigulang samtang nakuhaan ang usa ka buntis.

Niadtong September 10, 2020, kapin 15 ka pamilya ang pugos nga nagbakwit human sila gihasi ug gihulga sa 37th IB ug gipangsunog usab ang ilang mga panimalay ug mga produkto sa Sitio Tupi Bato, Brgy. Midtungok, Sen. Ninoy Aquino. Gipasanginlan sila nga mga tigsuporta sa New People’s Army.

Dugang pa, panahon sa operasyon ginabawalan sa militar ang mga mag-uuma nga mopalit og dinaghan nga pagkaon ug uban pang panginahanglan sa pamilya, ginadid-an nga magpagaling sa ilang produkto, gitakdaan og oras sa ilang pag-panguma ug nagpahamtang kini og curfew aron kontrolon ang lihok sa mga tao.

Ang walay hunong nga operasyong militar sa probinsiya labaw pang nagpagrabe sa kalisud ug kalbaryo nga nahiaguman sa masang mag-uuma ug lumad sa pag-atubang sa kalisdanan sa COVID19. Daghan ang mga restriksyon sa lihok nga gipatuman sa gobyerno nga nagpugong sa hapsay ug paspas nga pagpagawas ug pagbaligya sa mga produkto sa mag-uuma.

Ang pokus ug sustenidong operasyong militar sa probinsiya nakagambalay sa kontra-rebolusyonaryong palisiya sa rehimeng Duterte nga puohon ang rebolusyonaryong kalihukan sa probinsiya aron hapsay nga makasulod ang dakung proyekto sama sa mining, logging ug mga plantasyon sa pamilyang Consunji.

Sa pikas bahin, nagtinguha usab kini nga panalipdan ang mga nagharing hut-ong sa lokalidad nga walay hunong nga nagapahimulos ug daw linta nga nagsuyop sa dugo sa masang mag-uuma sama sa taas nga porsyento sa pagpautang samtang ubos kaayo ang palit sa produktong kape, mais, lubi ug palay.

Tungod niini, gina-awhag sa NPA-Sultan Kudarat ang tibuok rebolusyonaryong pwersa ug katawhan nga ibutyag, kundenahon ug pakyason ang brutal nga iskema ug walay hunong nga pagpanglapas sa katungod-tawo nga binuhatan sa korap, palisud, itoy ug mangtas nga rehimeng Duterte. Angayan nga labaw pang pakusgon ang armado ug dili armadong pagsukol sa katawhan batok sa pagpangdaug-daog ug pagpahimulos.##