Mataas nga pagpasidungog kag pagsaludar sa pito ka martir sang NPA-Panay
![]( https://philippinerevolution.nu/wp-content/uploads/2023/12/npa-central-panay-jose-percival-estocada-jr-command-map-1024x576.png )
Ginasaludaran kag mataas nga ginapasidunggan sang Partido Komunista ng Pilipinas, Bagong Hukbong Bayan, bug-os nga rebolusyonaryong kahublagan kag mga masa sa isla sang Panay ang pito ka pulang hukbo nga namartir sa pila ka serye sang mga depensibang aksyon nga natabu sa Barangay Cabatangan, Lambunao kag Barangay Aglonok, Calinog pareho nga sakop sa probinsya sang Iloilo. Ang nasambit nga hitabu resulta sang mas pinasingki kag mas ginpapintas nga mga operasyon militar sa lindero sang Janiuay, Lambunao kag Calinog sa Iloilo, Valderama sa Antique kag Libacao sa Aklan. Ang ini nga mga lugar malawig na nga ginpaidalom sa focus military operation sa diin nagbaha diri ang pagbubu sang madamu nga pwersa sang militar nga amo ang 12th IB, 82nd IB, 61st IB kag DRC sa idalom sang 3ID, RPSB-PNP kag mga CAFGU. Apisar sini, maisog nga gin-atubang sining mga namartir ang kaaway kag hugot nila nga gin-uyatan ang rebolusyonaryong panindugan sa pagkapot sang armas tubtob sa ulihi nga ginutlo sang ila ginhawa.
Ang mga namartir nga mga kaupod amo sanday Benjamin Cortel (Mamang/Ruby) nga napatay sa Aglonok, Calinog sang Agosto 5, Jose Jerry Takaisan (Miller) nga napatay sa Cabatangan, Lambunao sang Agosto 7 kag ang ulihi nga lima nga napatay sa Aglonok sadtong Agosto 8 amo sanday Romulo Ituriaga Gangoso (Pedik/Regan), Armando Rogelio Sabares (Nene/Kulot), Aurelio “Boy” Bosque (Rio/Zarko/Baijan), Jovelyn Silverio (Akay/Purang), Jielmor Gauranoc(Tango/Doc). Ini tanan sila naghalin sa nagkalain-lain nga henerasyon sang ila sektor kag sahi, sa kubay sang pamatan-on nga estudyante, mamumugon kag mga mangunguma.
Indi sarang maitago kag mapunggan ang kasakit sang balatyahon, singgitan para sa hustisya kag ang kaugot bangod sa brutal nga pagpamatay sa ila.
Ang ila pagkadula mitsa sang padayon nga pag-igrab kag pagsulong sang rebolusyunaryong armadong paghimakas para sa paghatag katumanan sa ginapakig-away nga matarung nga kawsa sang malapad nga masang pumuluyo sa isla sang Panay kag sa bug-os nga pungsod. Samtang indi matagaan kalubaran ang ugat sang pag-antus kag pagka-ulipon sang masa sa idalom sang mapiguson kag mahimuslanon nga sistema sang pagdumalahan sang mga nagahari nga sahi sa pungsod, magapadayon nga buhi ang ila ginpakig-awayan kag padayon nga paga-usuyon sang masang anakbalhas ang dalan sang armado nga pagbato.
Hugot ang amon pagkasubo sa pagkapatay sang mga maayo, mapisan kag mga maisog nga kadre sang Partido kag Bagong Hukbong Bayan. Ginapaabot man namon ang amon pag-unong sa tanan nga pamilya, himata, mga kaabyanan kag mga masa nga lubos nga nagpalangga sa ila.
Nasaksihan sang mga pumuluyong tumandok ilabi sang masa sa Sentral Panay kag sang mga mangunguma kon paano maayo nga nakipamuhi, nagpakita sang maayo nga pamatasan, nag-uyat sang salsalon nga disiplina, nag-amot sang kinaalam kag abilidad, kag nakig-unong sa ila ang ila ginakabig matuod-tuod nga hukbo sang masa. Sa denekada nga panahon, kabuhi-kamatayon ang nangin pag-unungay sang masa kag hukbo sa pagpangapin sang ila duta, ilistaran kag pangabuhian batok sa mapintas, terorista kag manuglanggab duta nga 3rd ID Philippine Army kag reaksyunaryong gobyerno.
Ano pa man nga pagpakalain o pagpakademonyo ang himuon, paglaragway kag pagbuyayaw sang mga berdugong teroristang militar sa mga kaupod kag komunista nga nagkalamartir, indi sini matabunan ang kamatuoran sang ila pagkabaganihan bangod sa ila indi matawaran nga pag-alagad sa masa kag sa wala katumbas nga pagsakdag kag pagpalangga sang masa sa hukbo bilang ila tagpangapin.
Angkon nga kinaiya sang sining mga baganihan nga mga hukbo kag komunista nga ihatag ang tanan nila nga ikasarang, kinaalam kag abilidad sa ila nangin lubos panahon nga pag-alagad sa masa nga ginapigos kag ginahimuslan sa pagsakbat sang mga mapanghangkat nga hilikuton kag katungdanan para lubos nga maipasulong ang pungsudnon demokratiko nga rebolusyon paagi sa malawigan inaway banwa.
Napatay man ang pito ka hukbo sang isla sang Panay, pirme ta nga panumdumon nga indi san-o man sini mapalong ang kalayo sang inaway banwa sa Pilipinas. Tigaylo, padayon ini nga magadabdab sa balatyagon sang malapad nga masa bangod padayon nga nagatalom ang krisis sang katilingban nga Pilipino. Labi nga nagakaluto ang obhetibong kahimtangan kag mas nga magapangisog ang masa nga magbato bangod sa gihapon ara nga nagapabilin ang mga rasones sang armadong banggianay.
Wala sang liwan kag pinakamataas nga porma sang pagdayaw kag pagpasidungog sa mga martir kag baganihan sang rebolusyon kundi ang ipabilin sila nga buhi sa aton balatyagon kag panumduman, uyatan sang hugot ang panindugan sa pagkapot sang armas kag ipadayon ang kawsa nga ila ginhalaran sang bulawanon nila nga kabuhi.
Gani amon nga ginasaluduhan kag ginapasidunggan ang pito ka kaupod nga namartir. Amon man nga ginakilala ang tanan nila nga kontribusyon, sakripisyo kag kabuhi nga ginhalad sa ila wala kabaylo nga pag-alagad sa masa kag sa rebolusyon, sa ila kinaalam sa pagtungod sang ila tagsa ka responsibilidad, sa ila abilidad sa pagpatuman sang tagsa ka mga hilikuton kag sa ila lubos ikasarang nga maitib-ong ang kawsa sang pungsudnon demokratiko nga rebolusyon nga may sosyalistang perspektiba.
Pula nga pagsaludar sa pito ka baganihan!
Mabuhay ang NPA!
Mabuhay ang rebolusyong Pilipino!