Ginpabatyag sang mga pumuluyo kag mangunguma ang ila kusog sang sila ululupod nga naghulag agud pamatukan ang 6,652.32 ektarya sang makahalalit nga proyekto nga oil palm.

Makatarunganon ang kaakig kag paghimakas nga ginaduso sang mga pumuluyo ilabi na sang mga apektado kag biktima. Ang ini nga agro-industriyal nga proyekto nagsakop sa duha tubtob tatlo ka banwa sang Sur sang Negros: Candoni, Hinobaan, kag Ilog. Kadam-an sa nasakupan sang plantasyon sang oil palm yara sa banwa sang Candoni. Indi kauswagan ang ginadul-ong sini sa mga pumuluyo, kundi bangungot kag delubyo. Dugang ini nga paantus sa mga mangunguma nga tubtub subong wala pa nakabangon bangud sa El Niño, tigkiriwi, sunud-sunod nga mga bagyo, tuman ka taas nga presyo sang balaklon, kag kabarat sang sweldo kag benepisyo sang mga mamumugon. Bangud sini, mangin lapnagon ang gutom kag kawad-on sang palangabuhian, puluy-an, duta kag pagkawasak sang kapalibutan.

Ginhimo nga hinganiban sang reaksyonaryo nga gobyerno ang mismo mga laye nga ila ginhimo bilang pagpakita sang ila pagluhod sa dumuluong nga interes sang mga multi kag trans-nasyunal nga mga korporasyon. Gamit ang Department of Environment and Natural Resources (DENR), Department of Agrarian Reform (DAR), kag National Commission on Indigenous Peoples (NCIP), napatuman ang handum ni Marcos Jr kag sang iya mga kroni nga Araneta-Consunji-Marubeni Corp. (Hapon nga kompanya) nga pagahimuslan ang kusog pangabudlay sang mga pumuluyo kag agawon ang ila mga kadutaan.

Malawig na nga nakagapos ang mga Negrosanon sa tumandok nga pyudalismo sa sistemang asyenda sa idalum sang monocrop nga industriya sang kalamay. Gani, ang pagsulod sang oil palm nga plantasyon mas magpalala pa sa pyudal kag mala-pyudal nga pagpanghimulos sang mga pumuluyo. Mangibabaw man ang pasismo kag impyunidad sang mga berdugo kag pasista nga tropa sang Armed Forces of the Philippines (AFP)-Philippine National Police (PNP) sa kaumhan kapin pa nga sila nagasakdag sa interes sang dumuluong, burukrata kapitalista, dalagko komprador burgesya, kag agalon mayduta.

Hangkat sa mga apektado kag sa bilog nga pumuluyong Negrosanon nga pamatukan ang proyekto sang oil palm kag pangapinan ang ila kinamatarung sa duta, trabaho, kag puluy-an. Andam nga magbulig kag maghatag sang bug-os nga kusog kag ikasarang ang NPA agud pangapinan kag isulong ang interes sang mga pumuluyo. Matambok ini nga duta para sa pagduso kag paglapta sang kalayo sang paghimakas agud maangkon ang mga kadalag-an sa pungsodnon demokratiko nga rebolusyon. ###