Indi para sa interes sang pumuluyong Pilipino kundi adyenda sang US ang pagpamalabag sang rehimen Marcos Jr nga liwat pormal nga buksan ang hambalanay sa kalinong (peace talks) sa National Democratic Front of the Philippines (NDFP). Nagpaguwa sang pahayag si Eduardo Año, National Security Council (NSC) adviser ni Marcos Jr nga indi pabor ang NSC nga liwat buksan ang peace talk sa tunga sang GRP kag NDFP. Luyag sini nga isungka anay sang Communist Party of the Philippines (CPP)-New People’s Army (NPA)-NDF ang iya armas antes mag-atubangay agud maghinun-anon.

Ginapakamala-ot sang Armando Sumayang Jr Command (ASJC)-NPA kag sang bilog nga rebolusyonaryo nga pwersa ang pagpamalabag sang rehimeng Marcos Jr sa negosasyon pangkalinong nga ginkasugtan sa Oslo, Norway sadtong Nobyembre 2023 sa tunga sang Gobyerno sang Republika sang Pilipinas (GRP) kag NDFP. Sunod-sunuran si Marcos Jr kag Año sa mando sang ila amo nga imperyalistang US nga siradohan ang malinong kag diplomatiko nga pagresolba sang mga ugat sang nagaluntad nga gyera sibil sa pungsod nga 55 na ka tuig nga nagapadayon nga nagahimakas batuk sa imperyalismo, pyudalismo, kag burukrata kapitalismo. May kaangot man ini sa ginaluto nga gyera sa West Philippine Sea sang US sa iya karibal nga Tsina.

Indi interesado si Marcos Jr kag iya mga idu-ido nga opisyal sang militar kag mga kroni nga burukrata kapitalista, dalagko kumprador kag agalon mayduta nga padayunon ang hambalanay pangkalinong. Binilyon ka piso ang ginbubo sang US nga ayuda militar sa Pilipinas agud mapasingki ang mapintas nga gyera kontra-insurhensya para mapasulod ang mga dumuluong nga proyekto pareho sang oil palm sa Candoni kag Hinobaan, tanan sang Negros Occidental kag mga dalagko nga proyekto sang mina sa iban nga bahin sang sur sang Negros. Ginahimo man nga gatasan sang rehimen ni Marcos Jr kag sang NTF-Elcac ang mga Barangay Development Program nga naghatag lang sang kauswagan sa iya mga kroni kag korap nga mga opisyal sang militar.

Gani, balik-awot ang panindugan sang reaksyonaryong gobyerno angot sa kalinong. Maduguon ang ila hampang sa pagsolbar sa mala-kolonyal kag mala-pyudal nga krisis sang aton nga pungsod. Wala untat ang kampanya nga likidasyon kag pagdakop sang mga konsultant sang negotiating panel sang NDFP. Pinakaulihi nga ginsalbeyds si Rogelio “Ka Cocoy” Posadas sadtong Abril, 2023, samtang padayon nga nadula tubtob subong ang iya nga upod nga si Lyngrace Marturillas, kag mga drayber sang habal-habal nga ila ginsakyan nga sila Renel delos Santos kag Denald Mialen. Hungod man nga ginpatay sang mga militar si Ericson “Ka Fredo” Acosta nga isa man ka NDFP consultant sadtong Nobyembre 2022. Gintortyur sila antes ginpatay. Nagapabilin nga nabilanggo sa mga pato-pato nga kaso sila Ramon Patriarca kag NDF-Negros Spokesperson Frank Fernandez kag iya asawa nga si Cleofe Lagtapon.

Samtang, lapnagon pa gihapon ang mga focused military operation kag Retooled Community Support Program (RCSP) sang mga tropa sang 15th kag 47th IB sa bilog nga bahin sang sur sang Negros nga nagtuga sang madamu nga paglapas sa tawhanon nga kinamatarung batok sa pumuluyo pareho sang pagpamatay, pilit nga pagpasungka, pagpamahug, sarbeylans, pagpangsaka-saka sa mga panimalay kag pagpasaka sang kaso sang Anti-Terrorism Act agud tapnaon ang tanan nga porma sang pungsodnon kag demokratiko nga paghimakas sang pumuluyo. Sa sini nga tuig, ginpatay sang nasambit nga militar si Ramon Enseniales, isa ka mangunguma nga senior citizen, sa Cauayan, Negros Occidental. Wala kaluoy man nga ginpatay sang mga berdugo nga tropa sang 15th IB ang duha ka hors de combat nga sila Reggie Fundador (Ka Tata) sadtong Hulyo 31 kag Alvin Sinsano (Ka Zian) sadtong Agosto 1 sa Sipalay City, Negros Occidental.

Makatarunganon ang armado nga paghimakas nga ginasulong sang NPA. Tubtub nga nagaluntad pa ang pagpanghimulos sang mga nagahari nga sahi, kagutom, kapigadohon, kawad-on sang duta kag kawad-on sang mga sandigan nga serbisyo sosyal, magapadayon ang gyera sibil sa Pilipinas. Determinado ang pumuluyong Negrosanon kag ang bilog nga pumuluyo nga maghiliugyon kag maghimakas sa tanan nga patag sang pagpakig-away, ilabi na sa banas sang armado nga paghimakas agud pangapinan ang ila nga pungsodnon-demokratiko nga interes para sa duta, palangabuhian, makabuhi nga sweldo, edukasyon, ikaayong lawas kag iban pa.

Hugot ang panindugan sang ASJC-NPA nga labi nga pabaskugon ang rebolusyon kag maglunsar sang mga taktikal nga opensiba para maangkon ang hustisya kag matuod nga kalinong kag kahilwayan.###