Iti tengnga ti panagsaknap dagiti kaso ti Covid ken pannakaisubli ti lockdown iti adu a paset ti pagilian, rumungrungsot ti rehimen US-Duterte ken ti armado a puersa na.

Kas ti nailanad iti naglabas a State of the Nation Address (SONA), pilpilien ni Rodrigo Duterte nga ikkan ti panawen, pigsa, ken kuarta ti panangpalawa iti turay na babaen iti Anti-Terrorism Law (ATL) ken panangikuspil kadagiti demokratiko ken nainkalintegan a pannakidangadang ti umili a kagiddan ti awan-sarday a militarisasyon iti kaaw-awayan babaen iti National Task Force to End Local Communist Armed Conflict (NTF-ELCAC). Ngarud, awan ti panggep ken plano na tapno naan-anay ken napartak a risuten ti krisis nga intunda ti Covid pandemic.

Iti bangir na, karkaro pay a rigat ti sagsagabaen ti umili a Pilipino iti agdama.

Militarisasyon imbes a makan ken taraon

Iti probinsya ti Abra, naminsan laeng a nawarasan ti Social Amelioration Program dagiti umili ngem tuluy-tuloy a maponpondoan ti armado a pwersa ti reaksyunaryo a gobyerno. Imbes a maipan iti taraon, agas, ken panangtaming kadagiti masakit, ti buis ti umili ket maususar kadagiti nagastar nga operasyon militar ti AFP ken PNP.

Iti agdama, nasaknap ti operasyon a kombat dagiti nagkukuyog a tropa ti 24th IBPA, 69th IBPA, PNP SAF, ken CAFGU kadagiti ili ti Abra nangruna iti Pilar, San Isidro, Boliney, Sallapadan, Luba, ken Tubo.

Iti uneg ti maysa a lawas, nagsasaruno ti panagusar ti Philippine Air Force kadagiti recon plane, drone ken helicopters kadagiti nasao nga operasyon. Iti kastoy, minilyon ti inaldaw a gastos ti AFP-PNP (P681,700 ti gastos kada oras kada maysa a Huey helicopter). Awan la ngaruden maitulong ken mangpataud pay ti buteng iti umili gapu kadagiti panagpapaputok, dagitoy ket agiwarwara pay laeng ti inuulbod a propaganda laban iti rebolusyonaryo a tignayan nga idadauluan ti CPP-NPA-NDF.

Nagisayangkat met laeng dagiti tropa ti PNP-SAF ti “war games” iti uneg dagiti baryo, kataltalunan, ken pagalaan ti nayon a makan dagiti umili.

Nayon na pay, awanan bain dagiti tropa ti AFP-PNP a nagbarbartek, nagtakaw ti mula, nangabot ken nangperdi iti hose ti danum, nangibus iti datin a limitado a suplay iti baryo, nangrugit ken nangdadael iti aglawlaw, ken inaramat kas a human shield dagiti umili babaen iti panagkampo iti uneg ken aglawlaw ti baryo a nangdistorbo iti urnos ken kappia iti ili.

Kagiddan na, agtultuloy ti intelligence ken psywar operations ti AFP-PNP a nayon a mangburak iti urnos ken panagkaykaysa ti umili. Maipaspasidong met iti sarbeylans, pananglipit, ken presyur nga agsurender dagiti lider-mannalon, aktibista, organisasyon a masa, kapamilya dagiti aktibo nga NPA, ken uray dagiti dati a kameng.

Dagitoy nga operasyon ket panaglabsing iti karbengan dagiti nailian a minorya iti Free, Prior, and Informed Consent. Kasta met a mangipaay dagitoy ti nayon a bisin ken palalo a taktak iti panagtalon ken panagbirok ti umili ti dadduma pay a taraon. Peggad met laeng iti salun-at ti umili ti presensya dagiti soldado, pulis, CAFGU, ken intel gapu ta umuneg ken rumuar da iti baryo nga saan da a suruten dagiti quarantine protocols idinto nga adun dagiti nagpositibo iti covid kanyada. Nasurok 800 ti apektado a pulis iti intero a pagilian, walo (8) kadagitoy ket kameng ti Police Regional Office Cordillera (PROCOR). Iti kabuklan, ikabil iti peggad dagitoy nga operasyon ti biag dagiti umili.

Anti-karbengan a rehimen

Bayat a mamirmiraut, marigrigatan ken mabisbisin ti umili a Pilipino, impamuspusan ni Duterte a palawaen ti turay na ken ayuen dagiti amo na nga imperyalista.

Iti pannakapirma ti Republic Act No. 11479 wenno Anti-Terrorism Law, amin a kumontra ken mangsupyat ken ni Duterte, amin nga agtigtignay ken lumablaban para iti karbengan ket mabirngasan a “terorista”. Sinnoman a maawagan a terorista ket saanen a mabigbig dagiti karbengan na.

Tapno ipabuya ti panangikuspil na iti amin a panagsupyat, impaserra na ti ABS-CBN, ti kadakkelan a network ti midya iti pagilian, ken indarum inggana inpakulong na ni Maria Ressa, respetado a journalist, gapu ta kritikal da iti turay ni Duterte.

Babaen met laeng iti Anti-Terrorism Law, nalaka a maipuesto ni Duterte dagiti nadumaduma a neoliberal ken imperyalista a polisiya iti tengnga ti kumarkaro a Covid pandemya.

Bassit ti budget para iti salun-at ken agbalbalin pay a pribado dagiti public hospital ken dadduma a serbisyo sosyal. Agtultuloy ti siwawaya a panag-import ti bagas, asukar, ken dadduma pay a produkto nga isu ti mangpatay iti datin nga atrasado nga agrikultura; panangikkat ti kontrol kadagiti presyo ken panagsingir iti nangangato a buis; ken kontraktwalisasyon.

Ngarud, saan a ti Covid ti kangrunaan a mangpatay iti umili a Pilipino, no di ti pannakabisin, pannakaikulong iti baryo, pammutbuteng, ken pannakaidadanes iti sidong ti terorista a rehimen US-Duterte. Rumbeng nga ipaturong tayo dagiti pungtot, protesta, ken armas iti pudno a sakit, iti pudno a terorista.

Iti bangir na, singiren tayo manipud iti gobyerno dagiti rumbeng a programa ken subsidyo para iti salun-at, agrikultura ken industriya. Tubngaren tayo ti militarisasyon ken saan a pastreken dagiti tropa ti gobyerno tapno saan a maistorbo ti pangkabiagan, saan a maibus ti suplay a makan iti ili, maliklikan ti panagiwaras da ti Covid, ken mapatalinaed ti urnos ken kappia.

Saan tayo a lipatan nga awan ti sabali a mapagnamnamaan no di ti bukod tayo a panagtignay, panagkaykaysa, ken pannakidangadang para iti karbengan. Kagiddan ti panagpaksyat iti Covid ket ti panangbag-ut iti ramut ti amin a sakit ti umili. Kagiddan ti panaglaban iti militarisasyon ken terorismo ti Estado ket ti panangpalawa ken panagpatibker iti rebolusyonaryo a tignayan nga idadauluan ti CPP-NPA-NDF.##