Gipusil patay sa geyt sa engklabo sa Barangay Canlubang, Calamba si Dandy Miguel niadtong Marso 28. Si Miguel, mamumuo sa Fuji Electric Philippines, presidente sa Lakas ng Nagkakaisang Manggagawa sa Fuji Electric Philippines. Siya usab ang bise presidente sa Pagkakaisa ng Manggagawa sa Timog Katagalugan.

Gipangulohan ni Miguel ang pakigbisog sa unyon alang sa tinuig nga dugang suhulan nga pagatumanon sa mosunod nga tulo ka tuig ug magpatuman sa mga lakang panglawas batok sa Covid-19. Ika-10 siya sa mga aktibistang gipatay sa rehiyon niadtong Marso.

Sa Camarines Norte, gipatay sa 96th IB niadtong Marso 19 ang mag-amahang mag-uuma nga silang Louis Buenavente ug Jetly Buenavente. Ginagukod kanhi sa mga sundalo ang yunit sa Bagong Hukbong Bayan (BHB) nga mireyd sa mga pulis sa Purok 6, Barangay Dumagmang, Labo, Camarines Norte. Gipagawas nga mga Pulang manggugubat ang mag-amahan. Napusgay ang mga nawong sa mag-amahan ug adunay mga samad-pinusilan sa dughan.

Pagpamomba. Kapin 15,000 ka residente sa 15 ka komunidad sa mga Mangyan ang napalayas tungod sa pagpanganyon sa 203rd IBde sa mga barangay sa utlanan sa Mansalay ug Roxas sa Oriental Mindoro niadtong Marso 25-26. Pinakaapektado ang mga taga-Panaytayan sa Mansalay ug San Vicente sa Roxas.

Pagdagit. Gidakop sa mga sundalo sa 203rd IBde ang managsuon nga Kadlos ug Jeremy Lukmay, mga residente sa Sityo Kilapnit, Barangay Panaytayan, niadtong Marso 25 sa buntag. Mabdos ug usa ka magtutudlo si Kadlos samtang estudyante ang iyang igsuon. Wala pa sila gipagula sa mga sundalo.