Sa tunga sang lapnagon nga disempleyo kag pagtibusok sang kita kag negosyo, minilyon nga piso ang ginhatag sa mga mataas nga upisyal sang pribado nga mga kumpanya sa ila mga kaugalingon sa porma sang bonus kag dugang nga sweldo sang 2020.

Lakip sa ila ang anom nga mga mataas nga upisyal sang GMA 7 nga ginalakipan nanday Felipe Gozon kag Gilberto Duavit nga nagbaton sang ₱259 milyon sang 2020, 43% nga mas mataas kumparar sa 2019. Dugang diri ang 37% nga gintaas sang ila mga sweldo.

Subong man, nagtaas sang 12% ang sweldo ni Manuel Pangilinan kag apat pang upisyal sang PLDT, kon sa diin napaidalom ang Smart Telecommunications. Isa ka milyon pisos naman ang gindugang sa anay mga mataas nga bonus sang mga upisyal sini.

Sa pihak nga bahin, nagtaas sang 6.4% ang sweldo kag bonus nanday Ernest Cu kag apat pang upisyal sang Globe Telecommunications padulong sa ₱295 milyon sang 2020 halin sa ₱277 sang 2019.

Samtang, 17 bilyunaryo nga Pilipino ang ara sa listahan sang Forbes nga pinakamanggaranon nga indibidwal sa bilog nga kalibutan. Sa ila, si Manuel Villar (ika-352 sa bilog nga kalibutan) ang may pinakadaku nga deklarado nga manggad, masunod si Enrique Razon, Lucio Tan, Andrew Tan, mag-utod nga Sy, Ramon Ang, Lance Gokongwei, Roberto Ongpin, Ricardo Po kag Edgar Sia. Sa bilog nga kalibutan, ang tag-iya sang Amazon nga si Jeff Bezos gihapon ang numero uno.