Ipinanawagan ng National Democratic Front of the Philippines (NDFP) at ng Partido Komunista ng Pilipinas ang kagyat na pagpapalaya kay Loida Magpatoc, konsultant sa usapang pangkapayapaan sa pagitan ng NDFP at gubyerno ng Pilipinas. Ligtas dapat siya sa pag-aresto at panggigipit sa ilalim ng Joint Agreement on Safety ang Immunity Guarantees. Dapat kagyat na ibasura ang gawa-gawang mga kasong isinampa laban sa kanya. Dapat din siyang kagyat na bigyan ng ligal na representasyon at medikal na atensyon.

Iligal na dinakip si Magpatoc sa Barangay Paitan, Quezon, Bukidnon noong Setyembre 15. Sinampahan siya ng gawa-gawang kasong pagpaslang at pangwawasak ng ari-arian.

Noong Setyembre 16, iniutos ng korte ng Quezon City ang kagyat na pagpapalaya kay Esterlita Suaybaguio, isa ring konsultant ng NDFP, matapos ibasura ang kaso ng illegal possession of firearms and explosives laban sa kanya. Iligal siyang inaresto sa kanyang tinirhan sa Quezon City noong 2019.