Umad-ado a bilang dagiti kaso ti panaglabsing iti karbengan-tao ti maimalmaldit kadagiti ili ti Northern Samar iti sango ti awan-sarday nga operasyon kombat ti 20th IB ditoy. Itay nabiit, naimaldit ditoy dagiti kaso ti panagbomba, panagpaltog, blokeyo iti taraon ken pagbiagan ken sekswal a panagabuso dagiti soldado.

Iti ili ti Las Navas, nagpaputok ti paltog dagiti nabartek a soldado iti Barangay San Francisco idi Abril 9. Iti Barangay San Miguel, nagpaputok dagiti soldado ti mortar banda alas-11 ti rabii idi Marso 12 asideg iti kabalbalayan. Idiay Catubig, tinutukan ti paltog ken minolestiya ti maysa nga elemento ti CAFGU ken maysa pay a soldado ti maysa a 15-tawen a balasitang nga agaw-awid manipud iti salaan iti Barangay Hinagonoyan idi Abril 12.

Kabayatanna, patuloy a parparitan ti 20th IB dagiti mannalon iti amin a barangay a sakupen dagiti operasyon kombat da nga agitugot ti bagas wenno aniaman a taraon kadagiti pagtatalonan da. Konkontrolen met dagiti soldado ti garaw dagiti mannalon ken agipatpataw ti curfew.

Idiay Davao City ken Davao de Oro, linipit ken pilit a “paspasukuen” dagiti soldado ti 10th ID dagiti lider-mangmangged iti rehiyon a da Carlo Olalo ken Melodina “Melod” Gumanoy. Sinarungkaran dagiti soldado isuda ken dagiti pamilya da idi Abril 23 ken 26.

Iti Negros Occidental, inaresto ti 79th IB ken dagiti pulis ti dua a menor-de-edad nga agkabsat nga agtawen 16 ken 17 iti Sityo Humayan, Barangay Pinowayan, Don Salvador Benedicto idi Abril 25. Inparada ti 79th IB isuda kas naaresto nga “ubbing a mannakigubat” ti New People’s Army.

Idiay Albay, nasugatan iti pammaltog dagiti soldado da Ace Diano ken Francis Leteral iti Barangay del Rosario, iti Jovellar idi Abril 25. Iligal nga inaresto ken pinagpakleb met dagiti berdugo aguliteg nga Ernesto Lumangaya ken Arlan Lumangaya ngem nakalibas da.