Saan a bumaba iti 12 a progresibo ti indarum ti rehimen Marcos iti kaso a “terorismo” ken “terrorism financing” (panangpondo iti terorismo) iti napalabas a mano a lawas. Naiyuli dagiti kaso tapno lipiten isuda ken dagiti nakaibilangan da nga organisasyon.

Idiay Quezon, naidarum iti kaso a “terrorism financing” da Paul Tagle, tagapagsarita ti Tanggol Quezon ken Fritz Labiano, koordineytor ti Kabataan Partylist iti prubinsya. Naiyuli ti kaso kadakuada gapu iti panangited ti tulong ken taraon kadagiti balud pulitikal idi Hulyo 2023.

Iti Negros Island, naidarum iti kapada a kaso ti sumagmamano a dati ken aktibo a kameng ti “Paghida-et sa Kauswagan” Development Group Incorporated (PDG Inc). Napabasol ti “terrorism financing” da Clarissa Ramos, Felipe Levy Gelle, Federico Salvilla ken Perla Pavillar. Nakasuan met ni Darryl Albañez, saan a kameng ti PDG Inc ngem makitintinnulong iti grupo kadagiti aktibidad daytoy. Iti Leyte, arbitraryo a naipa-freeze wenno naparitan a magaraw ti bukod na nga akawnt iti bangko ni Jazmin Jerusalem ken ti idadauluan daytoy a Leyte Center for Development, Inc. (LCDe) idi Mayo 2. Naimandar idi Abril 26 ti panang-freeze kadagiti nasao nga akawnt gapu iti kaso a “terrorism financing” a naiyuli laban kenkuana ken maysa pay nga empleyado ti LCDe.

Idiay Nueva Ecija, nakasuan met ti “terorismo” wenno panaglabsing iti Anti-Terrorism Act of 2020 da Nathanael Santiago, Anasusa San Gabriel, Rosario Brenda Gonzales ken Servillano Luna, Jr nga aktibista ken lider masa laeng. Iramraman isuda dagiti soldado ti 84th IB iti engkuentro iti New People’s army (NPA) idiay Barangay San Fernando Sur, Laur, Nueva Ecija idi Oktubre 8, 2023, kalpasan kano a “nabigbig” dagiti soldado. Adda pay 30 a nagan a mairamraman iti nasao a kaso.