Agsasaruno a balligi ti nagun-od dagiti armado a grupo ti nailian a minorya ken umili a lumablaban iti nadumaduma a rehiyon iti Myanmar laban iti pasista a hunta a Tatmadaw. Manipud iti nasinasina a gagem, ngumatngato ti panagkaykaysa ken koordinasyon dagiti armado a grupo a kontra-hunta. Bimmanesbes ti aggigiddan ken iti sumagmamano a paset ket koordinado nga opensiba da manipud iti maudi a paset ti 2023. Natalek da a signipikante a mapakapsut da, nu saan ket tuluyan a mapabagsak ti kagurgura da a rehimen tatta a tawen.

Lumablabanen dagiti nailian a minorya iti pasista a militar ti Myanmar sakbay pay ti kudeta idi Pebrero 2021 a nangpadisi iti sibilyan a gubyerno ni Aung San Suu Kyi. Iti nabayag a panawen, insayangkat dagitoy ti armado a dangadang kadagiti estado ti Kayin ken Kachin iti daya a paset; iti estado ti Rakhine a mangluklukat iti Indian Ocean; ken iti amianan nga estado ti Shan, iti beddeng ti China. Kalpasan ti kudeta, limmaban metten dagiti nailian a minorya kadagiti rehiyon ti Sagaing ken Magway, kasta met iti estado ti Chin iti amianan a laud a paset, ken dagiti nailian a minorya iti estado ti Karen (maaw-awagan met a Kayah) iti beddeng ti Thailand. Dagitoy a grupo ket sumagmamano laeng iti nasurok 20 nga armado a grupo nga etnolingwistiko nga agraraira iti Myanmar iti agdama. Adu kadakuada ket mano a dekadan a makidangdangadang para iti karbengan iti bukod-a-pangngeddeng laban iti nailian a panangidadanes ti reaksyunaryo nga estado ken militar ti Myanmar.

Idi 2023, dakkel ti nasubbot a teritoryo ti Three Brotherhood Alliance manipud kadagiti puersa ti hunta. Daytoy ket kalpasan nga inyuswat da ti Operation 1027 manipud Oktubre iti nasao a tawen. Naagaw ti alyansa manipud kadagiti puersa ti hunta ti napapateg nga ili iti nagbeddengan ti Myanmar ken China nu sadino nga agay-ayus ti linnakuan iti baet ti dua a pagilian. Ginasut a detatsment ken kampo ti narebbek dagiti koordinado nga atake iti uneg ti 10 nga aldaw nga opensiba. Rinibo a soldado, kabilang ti sumagmamano a nangangato nga upisyal ti Tatmadaw, ti simmuko iti alyansa.

Nalawa met a teritoryo ti naruk-atan ti Karen National Union ken Karenni Nationalities Defense Forces manipud idi insayangkat daytoy ti Operation 1111 idi Nobyembre 2023. Kabinnadang ti dadduma nga armado a grupo, naagaw daytoy ti napapateg nga institusyon ken ahensya, kabilang ti hedkwarter ti pulis iti Loikaw, ti sentro ti estado a Karen idi Disyembre 2023. Idi Abril 24, indeklara ti Karenni State Interim Executive Council nga addan iti kontrol na ti 90% ti estado.

Kagiddan a pumigpigsa ti panaglaban ti Chinland Defense Forces tapno padisien ti puersa ti hunta iti teritoryo da. Idi Abril 29, naagaw daytoy ti hedkwarters ti batalyon ti Tatmadaw a mangkonkontrol iti paset ti karayan Irrawady a tulbek iti panagserrek ken ruar iti kabisera ti Kachin.

Iti Naypyitaw, Yangon ken dadduma pay a sentro nga urban ti pagilian, immarangkada met dagiti panagatake ti People’s Defense Forces (PDF), ti armado a grupo nga intakder ti National Unity Government manipud kadagiti grupo ti agtutubo ken aktibista. Idi Abril 5, koordinado a rinaut ti PDF babaen ti 28 a “kamikaze drone” ti pagtaengan ti dadaulo ti hunta a ni Min Aung Hlaing, ti kangrunaan a hedkwarter ti militar ken maysa a mayor nga airbase, iti kapital a Naypyitaw. Sakbay daytoy, adun dagiti kampo, detatsment ken tsekpoynt ti naparmek dagiti armado a grupo babaen ti babassit a drone. Maar-aramid dagiti nasaknap ken nasedsed nga opensiba gapu iti suporta a sagsagrapen dagiti armado a grupo manipud kadagiti demokratiko a sektor ti mayorya nga umili ti Bamar, ken dagiti grupo ti nailian a minorya. Babaen ti kumbinasyon ti regular ken gerilya a pannakigubat, maar-aramid da a guyuden dagiti puersa ti Tatmadaw ken pagdaraen daytoy iti nadumaduma a paset na.

Kas sungbat, pinainget pay ti pasista a Tatmadaw dagiti panagraut na kadagiti estado a kapipigsaan a lumablaban. Babaen kadagiti eroplano, helikopter ken drone, awan pilpilienna nga agbombomba ken agraraut daytoy kadagiti sibilyan a komunidad. Nagitunda dagitoy ti panagbakwit ti 2.8 milyon nga indibidwal ken pannakatay ti saan a bumaba iti 6,000 a sibilyan kabilang ti adu nga ubbing ken kababaihan. Dumanonen iti agarup 25,000 ti arbitraryo nga inaresto ti hunta manipud 2021.