Upisyal na nga ginkilala sang reaksyunaryo nga gubyerno ang pagpanag-iya sang 90 ka mangunguma nga katapo sang Malayang Kilusang Samahan ng mga Magsasaka ng Tinang (Makisama-Tinang) sa 68 ektarya nga duta sa Hacienda Tinang sa Conception, Tarlac sadtong Mayo 8. Bunga ini sang tatlo ka dekada nga nga paghimakas para sa duta kag liwat nila nga paglunsar sang kampanya nga pagbawi sa duta sa porma sang bungkalan sadtong Hunyo 2022.

Gintugyan sang Department of Agrarian Reform ang Certificate of Land Ownership Award sa mga taga-Tinang pagkatapos pila ka sulit ini nga gin-atras sa atubang sang tuman ka damo nga serye sang mga protesta, dayalogo kag kampuhan.

“Nag madinalag-on kami tungod sa amon ululupod nga paghulag nga lab-uton ang amon kinamatarung kag katarungan. Kung wala man kami naghiliugyon kag nanindugan, bisan gali yara sa habig namon ang husto, indi gid pag ihatag sang lubos ang kinamatarung. Kinahanglan gid ini nga ipakigbato,” base kay Alvin Dimarucut, pangulohan sang Makisama-Tinang.

Kadungan sang lubos nga pagtugyan sang titulo sang duta, ginduso man sang mga mangunguma ang pagbasura sa tanan nga mga kaso nga ginpasaka batuk sa Tinang 83 pareho sang obstruction of justice, usurpation of property rights, human trafficking, kag child exploitation. Ang Tinang 83 ang mga mangunguma kag ila tagasuporta nga gin-aresto samtang nagalunsar sang bungkalan sadtong Hunyo 2022.