Opisyal a binigbigen ti reaksyonaryo nga estado ti panagtagikua ti 90 a mannalon a kameng ti Malayang Kilusang Samahan ng mga Magsasaka ng Tinang (Makisama-Tinang) iti 68 ektarya a daga iti Hacienda Tinang idiay Concepcion, Tarlac idi Mayo 8. Daytoy ket resulta ti tallo a dekada a pannakidangadang para iti daga ken ti pannakairugi manen ti kampanya a pananggun-od iti daga iti porma ti bungkalan idi Hunyo 2022.

Impaay ti Department of Agrarian Reform ti Certifiate of Land Ownership Award kadagiti taga-Tinang kalpasan a namin-ado a nawaswas daytoy iti sangoanan ti nakaad-ado a panagsasaruno dagiti protesta, dayalogo ken kampuhan.

“Nagballigi kami iti panagtitinnulong mi a nanggun-od iti kalintegan ken hustisya. No saan tayo nga agkaykaysa ken agtalinaed a natibker, uray no adda iti benneg tayo ti kinapudno, saan a talaga a boluntaryo a maited ti kalintegan. Masapol nga ilaban dayta,” sigun ken Alvin Dimarucut, daulo ti Makisama-Tinang.

Bayat ti naan-anay a panakaited ti titulo iti daga, kiniddaw met dagiti mannalon ti pannakawaswas ti amin a kaso a naidatag maibusor iti Tinang 83 kas iti obstruction of justice, usurpation of property rights, human trafficking, ken child exploitation. Ti Tinang 83 ket dagiti mannalon ken tagasuporta da a naaresto bayat ti panangisayangkat da ti bungkalan idi Hunyo 2022.