Naglunsad og kolektibo o hiniusang pagpangisda ang Panatag Fisherfolks Association ug Pambansang Lakas ng Kilusang Mamamalakaya ng Pilipinas (Pamalakaya) sa kadagatan duul sa Masinloc, Zambales niadtong Mayo 30 hangtud Mayo 31 isip paghagit sa gipahamtang sa China nga “fishing ban” o pagbawal nga mangisda. Gipahamtang kini gikan Mayo hangtud Setyembre 16, sa mga erya sa South China Sea nga “amihanan sa 12 degrees North latitude” kung asa kabahin ang Panatag Shoal (Scarborough), nga 124-nautical miles (224 kilometro) gikan sa Zambales.

Gawas sa mga mangingisda, mikuyog usab sa paglawig ang mga lider sa Bagong Alyansang Makabayan, Pilipinong Nagkakaisa Para sa Soberanya, League of Filipino Students, ug Alliance of Concerned Teachers. Mikuyog usab ang mga representante sa Makabayan bloc nga silang Kabataan Rep. Raoul Manuel ug ACT Teachers Rep. France Castro.

Gawas sa pagsaway sa “fishing ban” sa China, gipanawagan usab sa ekspedisyon ang “hingpit nga demilitarisasyon” sa West Philippine Sea. Ang gipasabot sa grupo mao ang pagtukod sa China og mga isla ug ang agresyong militar sa imperyalistang US sa takuban sa mga operasyong “freedom of navigation” sa kadagatan.

Gimakmak usab nila ang bag-ong gihimong pagpamomba sa US sa kadagatan sa Zambales nga kabahin sa Balikatan war games. Sukad nga gilunsad kini, mikunhod ang nasikop nga isda ug kita sa matag pagpangisda.

Sa desisyon niini niadtong 2016 sa The Hague, gibasura sa Permanent Court of Arbitraton ang ginaingong 9-dash line sa China nga misakop sa tibuok South China Sea. Naghisgot kini sa teritoryo sa dagat sa Pilipinas nga milangkub sa 12-nautical miles (22 kilometro) gikan sa mga baybay niini, ug ang 200-nautical miles nga exclusive economic zone ug mga extended continental shelf. Giila niining tradisyunal nga pangisdaanan sa mga mangingisdang Pilipino, Vietnamese ug Chinese ang Panatag Shoal ug giakusahang paglapas ang pagpugong sa China nga makapangisda sa kadagatan ang mga mangingisdang Pilipino.