Nangangay ti kolektibo wenno sangsangkamaysa a panagkalap ti Panatag Fisherfolks Association ken Pambansang Lakas ng Kilusang Mamamalakaya ng Pilipinas (Pamalakaya) iti baybay nga asideg idiay Masinloc, Zambales idi Mayo 30 agingga Mayo 31 kas panangkarit iti inpakat ti China a “fishing ban” wenno panangiparit nga agkalap. Inpakat na ti panangiparit, manipod Mayo agingga Setyembre 16, kadagiti erya ti South China Sea nga “amianan ti 12 degrees North latitude” a paset ti Panatag Shoal (Scarborough), a 124-nautical miles (224 kilometro) manipod idiay Zambales.

Malaksid kadagiti mangngalap, kimmuyog met iti panaglayag dagiti lider ti Bagong Alyansang Makabayan, Pilipinong Nagkakaisa Para sa Soberanya, League of Filipino Students, ken Alliance of Concerned Teachers. Kimmuyog met dagiti pannakabagi ti Makabayan bloc a da Kabataan Rep. Raoul Manuel ken ACT Teachers Rep. France Castro.

Malaksid iti panangilaksid iti “fishing ban” ti China, inpanawagan met ti ekspedisyon ti “naan-anay a demilitarisasyon” ti West Philippine Sea. Supsuppiaten ti grupo ti panangibangon ti China kadagiti isla ken ti agresyon a militar ti imperyalismo nga US iti linged dagiti operasyon a “freedom of navigation” idiay baybay.

Tinubngar da met ti nabiit pay nga insayangkat a panagbomba ti US idiay baybay ti Zambales a paset ti Balikatan war games. Manipod nairussuat daytoy, bimmaba ti nakalap nga ikan ken sapol iti tunggal panaglayag.

Iti desisyon na idi 2016 idiay The Hague, winaswas ti Permanent Court of Arbitration ti makunkuna a 9-dash line ti China a mangsakop iti intero a South China Sea. Dinakamat na ti teritoryo a pangbaybay ti Pilipinas a mangsakop iti 12-nautical miles (22 kilometro) manipod kadagiti aplaya na, ken ti 200-nautical miles nga exclusive economic zone ken dagiti extended continental shelf. Binigbig na a tradisyonal a pagkalapan dagiti mangngalap a Pilipino, Vietnamese ken Chinese ti Panatag Shoal ken naibilang a panaglabsing ti pananglapped ti China a makakalap iti bahura dagiti mangngalap a Pilipino.