GIKWESTYON SA Citizen’s Disaster Response Center Foundation (CDRC) ug Leyte Center for Development Enterprise, Inc. (LCDE) ang gipahamtang nga “freeze order” sa Anti-Money Laundering Council sa ilang mga akawnt sa bangko. Nagpetisyon ang CDRC sa Court of Appeals sa Quezon City niadtong Hunyo 2 samtang ang LCDE niadtong Mayo 17 sa parehong korte sa Cebu City. Tumong nilang ipatangtang kini ug hagiton ang ligalidad sa sangsyon nga matud nila wala miagi sa hustong proseso, ug lapas sa mga katungod sa gawasnong pagpadayag ug asosasyon.

Ang CDRC ug LCDe duha lamang sa daghan nang mga asosasyong progresibo ug organisasyong pangkalambuan nga arbitraryong gipahamtangan og “freeze order” human giakusahan og “terrorism financing.”

Ang maong pagpamig-ot nakagambalay sa gipagula sa rehimeng Marcos nga National Security Plan 2023-2028. Dayag nga nahisgutan dinhi ang palisiyang pakusgon ang aksyon batok sa giakusahan niining mga ligal nga prente sa “CPP-NPA-NDF aron putlon… ang tinubdan sa pinansya.” Kinsamang gitakda niining adunay kalambigitan sa rebolusyonaryong kalihukan, ang basta-basta ug walay-basihang ginapig-ot.