Magkasunod nga pagpamomba ug pag-atake ang gilunsad sa Zionistang Israel sa una nang giila niining “luwas nga lugar” sa Rafah, sa habagatang bahin sa Gaza, sugod niadtong ulahing semana sa Mayo. Gihimo kini sa Israel taliwala sa bag-ong desisyon sa International Court of Justice, nag-unang korte sa United Nations, niadtong Mayo 24 nga nagmando nga “dihadihang ihunong ang opensibang militar, ug unsamang aksyon sa Rafah.”

Niadtong Mayo 26, dili moubos sa 49 katawo ang napatay ug 250 ang nasamdan sa airstrike sa Israel sa “tent camp” (temporaryong lugar sa ebakwasyon) sa Al-Sultan sa Rafah. Duha ka adlaw ang milabay, gibomba sa mga pwersang Israeli ang tent camp sa Al-Masawi sa Rafah nga mipatay sa 21 ka Palestino ug 64 ang nasamdan. Katunga sa mga biktima mga bata, babaye ug tiguwang. Naabo ang temporaryong kampo nga gisilungan sa mga mibakwit sa Rafah nga pulos gama sa mga trapal.

Kasamtangang gisilungan sa kapin 1.5 milyong Palestino ang Rafah sukad nga giatake sa Israel ang Gaza niadtong miaging tuig. Nagtukod sila dinhi og mga balaybalay ug nagpasilong sa mga tent kung asa kulang kaayo sa pagkaon ug tambal, ug makaluluoy ang kahimtang sa mga mibakwit.

Niadtong Hunyo 4, mikabat na sa 36,550 ang napatay, lakip ang 15,000 ka bata, sa henosidyo sa Zionistang Israel, samtang 82,959 ang nasamdan. Gatusan ka libong Palestino na ang napahawa ug napalayas sa ilang mga komunidad.

Pilipino para sa Palestine

Nagpadayon ang suporta sa mga Pilipino sa mga Palestino atubangan sa walay hunong nga mga pag-atake dinhi sa Zionistang Israel.

Niadtong Mayo 30, nagtapok ang lain-laing organisasyong masa sa University of the Philippines (UP)-Los Baños aron suportahan ang pakigbisog sa mga Palestino. Naglunsad usab og martsa ug panagtapok sa UP Diliman niadtong Mayo 19.

Samtang, nanawagan ang PUP for Palestine kang Quezon City Mayor Joy Belmonte ug ang Negrenses for Palestine kang Negros Occidental Governor Eugenio Lacson nga putlon ang pakig-lambigit nila sa mga upisyal sa Israel. Kini human sa pakigpulong nilang Belmonte ug Lacson sa mga upisyal sa Israel.

Sa Canada, nakighiusa ang mga grupong Pilipino sa protesta niadtong Mayo 29 sa Ottawa aron ipanawagan ang imbestigasyon sa pagbaligya og armas sa estado sa Canada sa Zionistang rehimen sa Israel. Panawagan usab nilang ipasarado ang CANSEC, ang tinuig nga arms show o merkado sa armas sa Canadian Association of Defence and Security Industries, na nag-abli sa Ottawa niadtong adlawa.