VFA, ibasura. Nagprotesta ang mga demokratikong organisasyon sa Cebu City niadtong Mayo 27 aron subling ipanawagan ang pagbasura sa Visiting Forces Agreement tali sa Pilipinas ug sa imperyalistang US. Kadungan kini sa ika-25 anibersaryo sukad nga ratipikahan kini sa Senado ilalum sa rehimeng Estrada niadtong Mayo 27, 1999. Gipangunahan ang protesta sa Bagong Alyansang Makabayan-Central Visayas.

Hunong-pasada sa Iloilo, gikasa. Naghunong-pasada ang mga drayber sa ginatawag nga “first town” o mga lungsod sa palibot sa Iloilo City niadtong Hunyo 3 aron babagan ang Local Public Transport Route Plan (LPTRP) sa syudad nga maglimita sa ihap sa dyip nga mosulod dinhi. Hilabihang maapektuhan dinhi ang mga drayber ug komyuter gikan sa mga lungsod sa Leganes, Pavia, Oton ug San Miguel sa maong iskema. Ang LPTRP kasumpay sa makilangyaw nga PUVMP o jeepney phaseout. Natukmod nila ang gubernador sa Iloilo nga atubangon sila sa usa ka dayalogo niadtong adlawa.

Kampuhan kontra komersyalisasyon sa UP-Diliman. Naglunsad og kampuhan ang mga estudyante sa University of the Philippines (UP)-Diliman niadtong Mayo 30-31 aron babagan ang nagkagrabeng komersyalisasyon sa unibersidad ug nakatakdang pag-abli sa bag-ong mall sa kampus niini sa Quezon City. Kauban nila sa kampuhan ang mga manindahay nga hilabihang maapektuhan sa pagsulod sa dagkung pribadong negosyo sa kampus. Gisugat nila og protesta niadtong Mayo 31 ang tigum sa UP Board of Regents.

Mandatory ROTC, batukan. Nagprotesta ang kabatan-onang Pilipino atubangan sa Senado sa Pasay City niadtong Mayo 22 aron ipadayag ang ilang pagsupak sa pagratsada sa sugyot balaodnong Mandatory Reserve Officers’ Training Corps sa senado. Niadtong Abril, gipadayag sa pipila ka senador ang plano nilang pagratsada sa maong mapanumpuong balaodnon ayha mahuman ang sesyon sa Senado.